28,684 total views
Mariing nanindigan ang Diyosesis ng Bangued laban sa banta ng malakihang pagmimina sa bayan ng Licuan-Baay, na naglalagay sa panganib hindi lamang sa kalikasan kundi maging sa kabuhayan at kalusugan ng mamamayan ng lalawigan ng Abra.
Sa pastoral statement ng diyosesis, iginiit ni Bishop Leopoldo Jaucian ang pagkakaisa ng simbahan sa pagtatanggol sa kalikasan at kabanalan ng nilikha ng Diyos.
“We raise our voice on a pressing issue that endangers both the beauty of our land and the well-being of our people: the threat of large-scale mining in Licuan-Baay,” pahayag ni Bishop Jaucian.
Binatikos ni Bishop Jaucian ang pagkakaloob ng Authority to Verify Minerals sa Yamang Mineral Corporation nang hindi dumaraan sa Free, Prior, and Informed Consent (FPIC) ng mga katutubo, na maituturing na paglabag sa karapatan at dangal ng mga pamayanan.
Binigyang-diin din ng obispo na ang magiging pinsala ng pagmimina ay hindi lamang mararamdaman sa Licuan-Baay, dahil dadaloy ang epekto nito sa Malanas at Baay Rivers patungong Abra River, na nagsisilbing pangunahing pinagkukunan ng buhay ng maraming pamayanan.
“Such disregard for law and community raises deep concerns about credibility, respect, and justice… Mining will bring contamination, flooding, and destruction that will reach many municipalities. What harms one part of Abra harms us all,” giit ni Bishop Jaucian.
Mariin ding kinondena ng diyosesis ang lahat ng gawaing pumipinsala sa kalikasan at nanawagan sa mga lokal na opisyal at ahensya ng pamahalaan na pairalin ang batas at ipagtanggol ang mamamayan.
“We call upon all local government officials and government agencies to act with courage and integrity,” panawagan ng obispo.
Hinimok din ni Bishop Jaucian ang bawat Abreño na manindigan para sa pangangalaga ng nilikha ng Diyos at sama-samang kumilos upang maipamana ang pag-asa, katarungan, at pangmatagalang pangangalaga para sa susunod na henerasyon.
“Let us be united in faith and in action. Let us choose life, justice, and stewardship. And may our collective “yes” to God’s gift of creation become the lasting legacy we pass on to future generations,” ayon kay Bishop Jaucian.
