18,968 total reads
Ganap nang ipinatutupad ng Diocese of Antipolo ang digitalization bilang bahagi ng pagpapalakas ng transparency at pananagutan sa pamamahala ng mga parokya.
Ayon kay Antipolo Bishop Ruperto Santos ito ang layunin sa full implementation ng Parish Information Management System (PIMS) sa mga parokya kung saan papalitan ng makabagong sistema ang manu-manong pagtatala at magbibigay ng mas mabisa, tumpak, at ligtas na pangangasiwa ng iba’t ibang records ng mga parokya.
“This undertaking is our concrete response to God’s call to faithful and prudent stewardship, as well as to the Church’s mandate for transparency and accountability,” ayon sa pahayag ni Bishop Santos.
Binigyang diin ng obispo na sa pamamagitan ng hakbang ay higit na mapangalagaan ang mga handog ng mananampalataya at matiyak na magagamit sa wastong mga pamamaraan.
“We assure you that your offerings are carefully safeguarded, properly utilized, and honestly accounted for in service of the Church’s mission,” ani Bishop Santos.
Bahagi ng sistema ang accounting module na magtatala ng mga transaksyon, pag-iisyu ng opisyal na resibo, pagsubaybay sa mga deposito at gastusin, at pagbuo ng komprehensibong ulat-pinansyal.
Hinimok naman ng obispo ang lahat ng parokya na makiisa at tiyakin ang wasto at tuluy-tuloy na paggamit ng PIMS sa araw-araw na operasyon bilang pagsasabuhay ng responsable at tapat na pangangasiwa sa yaman ng Simbahan.
Tiniyak ni Bishop Santos ang pagpapaigting sa mga hakbang sa pagsusulong ng matapat at makatarungang pamamahala sa mga handog sa simbahan bilang mga katiwala ng Panginoon.
