23,577 total reads
Ito ang mensahe ni National Shrine of Mary Queen of Peace o EDSA Shrine Rector Rev.Fr. Jerome Secillano at Running Priest Father Robert Reyes sa unveiling ng bagong mural na pinamagatang ‘Tayo ang People Power, Noon Ngayon Bukas’ na handog sa pagdariwang ng ika-40 taon ng EDSA People Power Revolution.
Binigyan diin ni Fr.Secillano na kinakailangan at napapanahon ang pagkakaisa ng mga Pilipino sa ilalim ng paggabay ng Simbahan upang higit na mapalalim ang pananampalataya at upang malabanan ang mga suliranin na kinakaharap ng Pilipinas.
Inihayag ni Fr.Secillano na kailangan ang pananampalataya sa pagpapanibago sa lipunang nasasadlak sa katiwalian at kawalan ng hustisya.
“At yung panghuli ay andoon, makikita mo yung faith component, religious component, na ibig sabihin sa pagpapanibago ng lipunan, kailangan din talaga natin ang tulong ng simbahan at pananampalataya,” ayon sa panayam ng Radyo Veritas kay Fr.Secillano.
Umaasa naman si Fr.Reyes na manatiling nag-aalab ang puso ng mga Pilipino upang labanan ang laganap na korapsyon sa pamahalaan.
Pinangangambahan ng nina Fr.Reyes at Fr.Secillano ang mabilis na pagkalimot ng mga Pilipino sa nangyayaring katiwalian sa bansa.
“Ang daming issue. Pero napapansin mo, parang yung init na dati matindi, parang lumalamig. Tapos ang daming iba-ibang issue na sumusulpot. Yung taong bayan, yung EDSA kasi, yung unang EDSA ay nangyari dahil may tinatawag na consistent, constant moral voice si Cardinal Sin. Ngayon, walang isang tao, eh. Pero anong nangyari? Maraming nagsasalita,” ayon naman sa panayam ng Radyo Veritas kay Fr.Secillano.
Malugod namang pinasasalamatan ng pamunuan ng EDSA Shrine ang mga Pilipinong artist at pintor na gumawa sa mural na kinabibilangan ni Anthony Jandusay, Tednicalao Camahalan, Rara Carrillo, Alvergel Frias at Abigail Bulan.
