23,908 total views
Isinusulong ng Akbayan Partylist ang House Bill 7911 na naglalayong ideklara ang February 25-bilang regular holiday bilang paggunita sa People Power Revolution ng 1986.
Ang panukala ay isinulong nina Akbayan Partylists Rep. Chel Diokno, kasama sina Rep. Perci Cendaña, Rep. Dadah Kiram Ismula, at Dinagat islands Rep. Kaka Bag-ao.
“February 25, 1986 is more than a date etched in history — it marks the moment when the Filipino people peacefully rose to reclaim their democracy. It stands as a testament to courage, unity, and the enduring power of collective action,” ayon kay Diokno.
Layunin ng hakbang na parangalan ang mapayapang pag-aalsa sa EDSA na nagtapos sa diktadurya ng Marcos at nagbalik ng demokrasya sa bansa.
Dagdag pa ng kongresista, “It is our responsibility to honor this defining moment with the full recognition and dignity it deserves as a regular national holiday.”
Ayon sa panukala, pabago-bago ang naging paggunita sa Feb. 25 sa mga nakaraang taon—noong 2023 bilang special non-working holiday, regular working day noong 2024, at special working holiday sa 2025 at 2026.
Giit ng mga mambabatas, nakababawas ito sa kahalagahan ng EDSA bilang simbolo ng katapangan, pagkakaisa, at kapangyarihan ng sama-samang pagkilos.
Sakaling maisapa bilang batas, taun-taon nang maipagdiriwang ang EDSA anniversary bilang regular holiday, at ang National Historical Commission of the Philippines ang mangunguna sa pagsasaayos ng mga gawain para sa paggunita.
Saklaw nito ang mga programa sa mga paaralan, ahensya ng gobyerno, at civil society upang mapanatili ang katotohanan ng kasaysayan at itaguyod ang demokratikong halaga at karapatang pantao.
Ayon kay Diokno, ang pagtatalaga ng February 25 bilang regular holiday ay pagpapatibay na buhay pa rin ang diwa ng People Power.
“Democracy survives not by accident, but because the people choose to defend it,” saad pa ng mambabatas.
