435 total reads
Magtitipon ang humigit-kumulang 2,000 kabataan mula sa Diocese of Boac sa bayan ng Torrijos, Marinduque bilang bahagi ng mas pinaigting na formation program ngayong panahon ng Kuwaresma.
Ayon kay Fr. Jovin Grimaldo, director ng Commission on Youth ng diyosesis, layunin ng pagtitipon na mailayo ang kabataan sa labis na pagkababad sa digital world alinsunod sa panawagang digital fasting ng Catholic Bishops’ Conference of the Philippines (CBCP) at higit na mapalalim ang kanilang buhay pananampalataya.
Isasagawa ang 1st Diocesan Convention of Novicios and Novicias sa ika-7 ng Marso bilang bahagi ng year-long celebration ng Year of the Family and Youth, kaugnay ng paghahanda sa ika-50 anibersaryo ng pagkakatatag ng diyosesis sa 2028.
“Imbes na sila’y maging abala sa mga social media o sa digital world, sila’y nagiging abala sa buhay kabanalan ngayong panahon ng Kuwaresma,” pahayag ni Fr. Grimaldo sa Radyo Veritas.
Ipinaliwanag ng pari na ang tradisyon ng novicios at novicias sa Marinduque ay matagal nang panata na unang isinagawa bilang paghahanda ng mga tatanggap ng sakramento ng kasal, at kalaunan ay ibinukas sa mga kabataan upang higit silang mapalapit sa Diyos sa pamamagitan ng pananalangin, sakripisyo, at pamamanata.
Ngayong taon, kauna-unahang pagbubuklurin ng diyosesis ang mga kabataan sa isang malawakang pagtitipon.
Bukod sa mga formation modules, nag-imbita rin ang pamunuan ng mga tagapagsalita mula sa TV Maria at Philippine Conference on New Evangelization (PCNE) upang tugunan ang kinahaharap na suliranin ng kabataan.
“Lalo na ngayon ang mga kabataan ay nakakaranas ng iba’t ibang challenges, particularly mga mental health, depression at anxieties,” ani Fr. Grimaldo.
Binigyang-diin ng pari na mahalagang maramdaman ng kabataan ang presensya at pag-ibig ng Diyos sa gitna ng kanilang pinagdaraanan.
“Napakahalaga na ang bawat tao, lalo higit ang kabataan, ay malapit sa Diyos at madama nila ang kanyang pag-ibig upang lagi nilang maalaala na may nagmamahal sa kanila,” dagdag pa ng pari.
Sa pamamagitan ng mas pinaigting na pananatili sa simbahan, pananalangin, at pagsasabuhay ng digital fasting, umaasa ang simbahan na higit na mapatatag ang pananampalataya ng kabataan at magabayan sila sa bawat yugto ng kanilang buhay.
Iginiit ni Fr. Grimaldo na patuloy ang paanyaya ng simbahan sa mga kabataan na mamuhay nang may pananalig at samahan ng panalangin ang bawat hamon na kanilang kinahaharap upang manatiling inspirado at pinagpapala.
Tema ng pagtitipon ang “Hamos, Hayon, Hayo: A Synodal Journey,” na paanyaya sa mga kabataang Marinduqueño na magbuklod sa paglalakbay bilang iisang simbahan.
Magsisimula ang gawain alas-7 ng umaga sa St. Ignatius of Loyola Parish Church, na susundan ng synodal walk patungong Torrijos Stadium kung saan gaganapin ang pagtitipon.
Bukod sa mga panayam, magkakaroon din ng synodal encounter ang mga kabataan kay Boac Bishop Edwin Panergo bago ang pagtatapos ng gawain sa pamamagitan ng banal na misa alas-2 ng hapon.
