1,082 total reads
Bilang pakikiisa sa panawagan ng pamahalaan sa pagtitipid dulot ng lumalalang krisis sa Gitnang Silangan, nanawagan si Antipolo Bishop Ruperto Santos sa mga parokya at mga institusyon ng simbahan, na maging huwaran sa tamang paggamit ng enerhiya.
Ayon sa obispo, bilang simbahan ay tungkulin ng bawat isa ng pagtuturo ng wastong pamumuhay at responsableng paggamit ng yaman.
“Hinihikayat ko ang lahat ng parokya, pamilya, at institusyon ng Simbahan na maging huwaran sa pagtitipid—sa kuryente, tubig, gasolina, at anumang likas na yaman. Ang simpleng pagpatay ng ilaw, pag-iwas sa sobrang biyahe, at pag-aalaga sa mga kagamitan ay konkretong ambag sa kabutihan ng bayan,” ayon sa bahagi ng mensahe ni Bishop Santos.
Sinabi ng obispo, na ito rin ang tamang pagkakataon na higit pang paigtingin ang mga programa ng simbahan sa pagkakawanggawa lalo na sa mga pamayanang higit na nangangailangan.
Ayon pa kay Bishop Santos, “Palalakasin natin ang ating feeding programs, community pantries, at livelihood support, lalo na para sa mga pinaka apektado—ang mahihirap, manggagawa, at mga pamilyang kapos na kapos.”
Tiniyak naman obispo na mananatili ang gampanin ng simbahan upang maging tahanan ng pag-asa sa mga nangangailangan, nakakaramdam ng pagod dulot ng mga pagsubok sa buhay.
Giit pa ni Bishop Santos, bagama’t hindi kontrolado ang pagtaas ng presyo ng langis o pandaigdigang ekonomiya ay kinakailangan ang tamang pagtugon, ang disiplina, pagkakaisa at pananampalataya.
“Sa panahon ng kagipitan, huwag tayong mawalan ng pag-asa. Sa panahon ng pagtaas ng presyo, huwag tayong mawalan ng malasakit. Sa panahon ng pangamba,huwag tayong bumitaw sa Diyos,” saad ni Bishop Santos.
Muli ring nanawagan ang obispo sa bawat mananampalataya ng patuloy na pananalangin para sa kapayapaan at hingin ang pamamagitan ng Mahal na Birhen lalo na sa panahon ng mga kinakaraharap na hamon
