352 total views
Inanunsyo ng Kanyang Kabanalan Leon XIV na magpupulong sa October 2026 ang mga lider ng Simbahang Katoliko mula sa iba’t ibang panig ng mundo upang higit pang pagtibayin ang pagpapahayag ng Ebanghelyo sa mga pamilya.
Ito ang pahayag ng Santo Papa kasabay ng paggunita sa ika-sampung anibersaryo ng Apostolic Exhortation na Amoris Laetitia, kung saan binigyang-diin ang pangangailangan ng sama-samang pagninilay at pakikinig sa gitna ng nagbabagong kalagayan ng pamilya sa lipunan.
“I have decided to convene the presidents of the Episcopal Conferences from around the world in October 2026… to proceed… to a synodal discernment on the steps to be taken in order to proclaim the Gospel to families today,” ayon kay Pope Leo XIV.
Paliwanag ng Santo Papa, layunin ng nasabing pagtitipon na tukuyin ang mga konkretong hakbang upang mas mapalalim ang paglilingkod ng Simbahan sa mga pamilya, lalo na sa harap ng mabilis na pagbabagong panlipunan.
Binigyang-diin ni Pope Leo ang mahalagang papel ng pamilya sa misyon ng Simbahan, na hindi lamang tumatanggap ng katuruan kundi aktibong katuwang sa pagpapalaganap ng pananampalataya.
“There are… circumstances in which the Church can become the salt of the earth only through the lay faithful and, in particular, through families,” saad pa ng santo papa.
Iginiit ni Pope Leo XIV ang pangangailangang palakasin pa ang pastoral na pagtugon ng Simbahan para sa sektor ng pamilya.
“The Church’s commitment in this area must be renewed and deepened,” giit ng Santo Papa.
Muling nanindigan ang punong pastol ng Simbahang Katolika sa kahalagahan ng pakikinig sa mismong karanasan ng mga pamilya bilang bahagi ng synodal na paglalakbay ng Simbahan.
“It is not possible to speak about the family without engaging families themselves, listening to their joys… sorrows… and anguish,” aniya.
Kasabay nito, kinilala rin ng Santo Papa ang mga hamon na kinahaharap ng mga pamilya sa kasalukuyang panahon, kabilang na ang kahirapan at karahasan.
Binigyang-diin nito na kinakailangang higit na samahan at suportahan ang mga pamilyang dumaranas ng iba’t ibang uri ng pagsubok.
Sa kabila ng mga hamon, pinuri ni Pope Leo XIV ang mga pamilyang patuloy na nagsasabuhay ng pananampalataya sa pamamagitan ng simpleng araw-araw na pagmamahalan.
“The spirituality of family love… made up of thousands of small but real gestures,” ayon kay Pope Leo.
Muling pinagtibay ng Santo Papa ang turo ng Simbahan na ang pamilya ay nananatiling pundasyon ng lipunan at isang “domestic church” na may mahalagang papel sa pagpapasa ng pananampalataya sa susunod na henerasyon.
Sa pamamagitan ng nalalapit na pandaigdigang pagtitipon ng mga obispo, inaasahan ang mas pinaigting na hakbang ng Simbahan upang matugunan ang pangangailangan ng mga pamilya at patuloy na maipahayag ang Ebanghelyo sa makabagong panahon.
Matatandaang March 19, 2016 nang ilathala ni Pope Francis ang Apostolic Exhortation Amoris Laetitia na bunga ng tatlong taong pagninilay na pinagyaman ng Jubilee Year of Mercy na layong paigtingin ang pagpapastol sa mga pamilya.
