3,166 total reads
Nanawagan ang Aksyon Klima Pilipinas (AKP) sa Kongreso na agarang isulong ang Rights of Nature Bill upang kilalanin ang kalikasan bilang may sariling karapatan sa gitna ng lumalalang krisis sa kapaligiran.
Ayon sa grupo, ang panukala—na saklaw ang ilang bersyon ng House Bills—ay maaaring maging makasaysayang batas na magtatama sa matagal nang pagtrato sa kalikasan bilang simpleng pinagkukunan ng yaman.
“Its potential as a landmark piece of legislation… would represent a significant step forward for the Philippines in ecological protection, conservation, and restoration,” pahayag ng AKP.
Binigyang-diin ng koalisyon na napapanahon ang panukala sa gitna ng sunod-sunod na proyekto at imprastrukturang pumipinsala sa kalikasan, kabilang ang flood control project na hindi naging epektibo at pinagmulan pa ng katiwalian.
Ipinaliwanag ng AKP na may batayan ang pagkilala sa karapatan ng kalikasan sa ilalim ng Republic Act No. 11995 o Philippine Ecosystem and Natural Capital Accounting System (PENCAS) Act, ngunit kailangan itong palawakin sa pamamagitan ng hiwalay at mas malinaw na batas.
“This means that the enactment of a standalone Rights of Nature Act can be interpreted as expounding on this provision, aligned with maintaining policy coherence,” ayon sa grupo.
Kasabay nito, hinikayat ng AKP ang mas maingat na pagpapatupad ng renewable energy projects sa ilalim ng Renewable Energy Act of 2008, na anila’y dapat nakabatay sa siyensya, konsultasyon, at paggalang sa mga sensitibong ecosystem.
Nagbabala rin ang grupo sa ilang bahagi ng panukala, lalo na sa hindi malinaw na kahulugan ng “commodification,” na maaaring maging hadlang sa pagpapatupad ng mga programa ng pamahalaan para sa pagtugon sa climate change.
“The text must be revised to prevent conflicts… and work in synergy with critical environmental and climate approaches,” saad ng AKP.
Iminungkahi rin ng koalisyon ang pagtatatag ng “ecological hierarchy of needs,” pagpapalawak ng mga “no-go zones” tulad ng protected areas at ancestral domains, at pagbibigay ng proteksyon sa mga environmental defenders laban sa red-tagging.
Para sa AKP, ang pagpasa ng panukala ay hindi lamang reporma sa polisiya kundi isang mahalagang hakbang upang matiyak ang kinabukasan ng kalikasan at ng susunod na henerasyon ng mga Pilipino.
Sa gitna ng panawagan para sa batas na kikilala sa karapatan ng kalikasan, nananatiling paalala ng simbahan, sa diwa ng Laudato Si’ ni Pope Francis, na ang pangangalaga sa daigdig ay isang moral na obligasyon ng sangkatauhan.
