4,510 total views
Naglunsad din ng donation drive ang social arm ng Diocese of Sorsogon upang makatulong sa pagtugon sa pangangailangan ng mga pamilyang napilitang lumikas bunsod ng patuloy na pagliligalig ng Bulkang Mayon.
Sa panawagan ng Caritas Sorsogon, hinikayat ang mga mananampalataya, religious organizations, at mga parokya sa diyosesis na makiisa sa pagbibigay ng tulong para sa mga evacuees na kasalukuyang nananatili sa mga evacuation center.
“Let us extend our support in light of the ongoing Mayon Volcano eruption,” ayon sa Caritas Sorsogon.
Kabilang sa agarang pangangailangan ng mga apektadong pamilya ang face masks, inuming tubig, at pagkain habang nagpapatuloy ang banta ng aktibidad ng bulkan.
Maaari ring magbigay ng cash donations sa PNB account ng Roman Catholic Bishop of Sorsogon sa account number na 253270002328.
Para naman sa in-kind donations, maaaring ihatid ang mga tulong sa mga itinakdang drop-off points sa mga parokya ng bikarya ng diyosesis, kabilang ang Sts. Peter & Paul Cathedral Parish sa Sorsogon City; St. Anthony of Padua Parish sa Gubat; St. Michael the Archangel Parish sa Irosin; Immaculate Conception Parish sa Bulan; Our Lady of the Pillar Parish sa Pilar, o kaya’y sa pinakamalapit na simbahan.
Para sa karagdagang detalye, maaaring makipag-ugnayan kay Caritas Sorsogon executive director, Fr. Ruel Lasay, CRS sa numerong 0917-628-2031.
Nanawagan naman ang Simbahan sa publiko na ipagpatuloy ang pakikiisa, panalangin, at konkretong pagtulong sa mga komunidad na apektado ng kalamidad.
