304 total views
Naglabas ng paalala at babala ang National Historical Commission of the Philippines (NHCP) sa mga tagapangalaga ng mga heritage site kasunod ng pagliligalig ng Bulkang Mayon sa Albay at 6.1 magnitude na lindol sa Eastern Samar.
Hinimok ng komisyon ang mga tagapangalaga ng mga simbahan, lumang gusali, museo, at iba pang pamanang istruktura na huwag basta pumasok sa mga napinsalang gusali nang walang pakikipag-ugnayan sa mga kinauukulang opisyal sa lugar at mga dalubhasa upang matiyak ang kanilang kaligtasan.
“Please do not attempt to enter damaged structures without prior coordination with local authorities, and only after confirming that aftershocks have ceased and the area is deemed safe. Your safety is paramount,” paalala ng NHCP.
Pinaalalahanan din ng komisyon ang mga namamahala sa mga heritage site na tiyaking ligtas at maayos na nababantayan ang paligid ng mga apektadong istruktura upang maiwasan ang pagpasok ng mga taong walang pahintulot, magnanakaw, at mga namiminsala ng mga makasaysayang istruktura.
Binigyang-diin din ng NHCP ang kahalagahan ng pagdodokumento sa mga napinsalang cultural objects at agarang pagsagip sa mga movable heritage items upang maiwasan ang mas matinding pinsala dulot ng aftershocks, malalakas na pag-ulan, o pagnanakaw.
Nagbabala rin ang NHCP sa publiko na maging maingat sa mga ibinabahaging larawan sa social media dahil maaari itong magamit ng mga mapagsamantala at iba pang may masamang intensyon laban sa mga pamanang lugar.
“Your personal safety is of utmost concern. Again, do not attempt to enter damaged buildings without consultation and coordination with site administrators and experts,” giit ng NHCP.
Nakasaad sa katuruang panlipunan ng Simbahan na ang pangangalaga sa kasaysayan, kultura, at kalikasan ay isang sama-samang pananagutan para sa kabutihang panlahat.
