6,087 total views
Nagkaisa ang Green Convergence at Laudato Si’ Movement Pilipinas sa panawagang palalimin ang kamalayan at pagkilos para sa pangangalaga sa kalikasan bilang paghahanda sa pagdiriwang ng Laudato Si’ Week 2026.
Sa isasagawang Kamayan Para sa Kalikasan forum sa ika-15 ng Mayo, tatalakayin ang temang “Anticipating Laudato Si’ Week: From Hope to Action,” na layong hikayatin ang publiko na gawing kongkretong pagkilos ang panawagan ni Pope Francis para sa pangangalaga sa nag-iisang tahanan.
Ayon sa Green Convergence at LSM Pilipinas, magsisilbing plataporma ang online forum upang maipakilala ang mga nakahanay na gawain para sa taunang paggunita sa ika-11 taong anibersaryo ng paglalathala ng Laudato Si’ mula ika-17 hanggang ika-24 ng Mayo.
“In anticipation of this year’s celebration of Pope Francis’ encyclical, we invite everyone to join us in learning more about the week-long lineup of activities and the different ways we can take part,” ayon sa dalawang organisasyon.
Kabilang sa mga inaasahang resource speakers sina LSM President Naderev ‘Yeb’ Saño, LSM Pilipinas Chapter Coordinator Sr. Elizabeth ‘Bing’ Carranza, at Calapan, Oriental Mindoro Diocesan Social Action Executive Director Fr. Edwin Gariguez, na magbabahagi ng pananaw hinggil sa pagbabagong pangkalikasan, katarungang pangklima, at napapanatiling kaunlaran.
“Let us continue the conversation on taking concrete steps toward genuine sustainable development and ecological integrity, guided by what Laudato Si’ teaches,” dagdag ng Green Convergence at LSM-Pilipinas.
Una nang binigyang-diin ni Pope Francis sa kanyang ensiklikal na Laudato Si’ ang panawagang pangalagaan ang nag-iisang tahanan sa gitna ng lumalalang krisis pangkalikasan.
