20,024 total views
Nagpaabot ng panalangin si Manila Archbishop Jose Cardinal Advincula para sa pagkakaisa, kapayapaan, at paggabay sa mga pinuno ng bansa sa gitna ng umiiral na tensyon at pagkakahati-hati sa lipunan.
Dalangin ng kardinal na manaig ang katotohanan, paggalang sa batas, at malasakit sa sambayanan sa gitna ng umiinit na mga usaping pampulitika at panlipunan sa bansa.
“Liwanagan mo ang isip at puso ng aming mga pinuno, upang manaig ang katotohanan, paggalang sa batas, at tunay na malasakit sa sambayanan,” bahagi ng panalangin ni Cardinal Advincula.
Hinimok din ng arsobispo ang sambayanang Pilipino na pairalin ang pag-unawa, pagkakaisa, at pagsusulong ng kabutihang panlahat kaysa galit at paghihiganti.
“Huwag mong hayaang manaig ang galit sa pag-unawa, ang paghihiganti sa pagkakaisa o ang pagkakampihan sa pagsusulong ng tama, makatwiran at ikabubuti ng lahat,” ayon pa sa arsobispo.
Dalangin din ni Cardinal Advincula ang paghilom ng bansa mula sa pagkakawatak-watak at hinimok ang mamamayan na maging mga instrumento ng kapayapaan, katarungan, at pag-asa para sa kapwa.
“Hilumin mo ang aming bansa mula sa poot at pagkakawatak-watak,” pahayag ni Cardinal Advincula.
Itinataas din ng kardinal sa pamamatnubay ng Mahal na Birheng Maria bilang Ina ng Bayan at Reyna ng Kapayapaan ang buong bansa upang akayin ang sambayanang Pilipino tungo sa pagkakaisa at pagkakasundo.
