429 total views
Paiimbestigahan sa Kamara ang magkasunod na pagpalya ng mga transmission line ng National Grid Corporation of the Philippines o NGCP na nagdulot ng red at yellow alerts sa Luzon at Visayas grids noong Mayo 13.
Sa inihaing House Resolution 1024 nina House Speaker Faustino Dy III at Senior Deputy Speaker Ferdinand Hernandez, nais siyasatin ng mga mambabatas ang pag-trip ng Tayabas-Ilijan at Dasmariñas-Ilijan transmission lines na naging sanhi ng pagkawala ng mahigit 2,400 megawatts ng kuryente.
“The back-to-back tripping of these major transmission lines exposed serious weaknesses in the reliability and resilience of our power grid. Kailangang malaman ng taumbayan kung ano talaga ang nangyari at kung may kapabayaan ba sa maintenance, monitoring, at compliance sa ating grid standards,” ayon kay Dy.
Dahil sa insidente, nagpatupad ang NGCP ng manual load dropping na nakaapekto sa tinatayang 3.9 milyong consumers sa Metro Manila, Batangas, Bulacan, Cavite, Laguna, at Rizal.
Ayon sa resolusyon, kailangang malaman kung dulot ng force majeure o may pagkukulang sa maintenance at operasyon ng transmission system ang nangyaring malawakang power disruption.
Sisiyasatin din ng Kamara ang kabiguan ng NGCP na agad iulat ang insidente sa Department of Energy at Energy Regulatory Commission alinsunod sa itinakdang protocol.
Dagdag pa ng mambabatas, “This inquiry is not just about assigning accountability. It is about protecting consumers, strengthening our energy security, and ensuring that the country’s transmission backbone is capable of supporting economic growth and national development.”
Kasama rin sa titingnan ng Kongreso ang posibleng kahinaan sa maintenance, protection systems, at contingency measures ng national grid kasunod ng magkakasunod na transmission failures.
Layunin ng imbestigasyon na matukoy ang dahilan ng insidente at maiwasan ang pag-ulit ng malawakang brownout na nakaapekto sa milyun-milyong consumers.
