365 total views
Mariing kinondena ng Pangasinan People’s Strike for the Environment (PPSE) ang nagpapatuloy na dredging at offshore mining operations sa Lingayen Gulf na pinangungunahan ng mga dayuhang mining corporations at malalaking negosyo.
Ito ay matapos maiulat ng mga mangingisda noong May 24, 2026 ang pagkakakita sa panibagong barkong pangmina sa paligid ng kanilang mga pook-pangisdaan sa Lingayen Gulf.
Ayon sa PPSE, lubhang naaapektuhan ng malawakang pagmimina sa karagatan ang kalikasan, kabuhayan ng maliliit na mangingisda, at seguridad sa pagkain ng mamamayan.
“Habang tuloy-tuloy ang malawakang extraction sa ating mga yamang mineral, kalikasan at kabuhayan ng mga maliliit na mangingisda ang siyang lubos na naaapektuhan,” pahayag ng PPSE.
Sa inilabas na video ng isang mangingisda, makikitang hinahalukay ng dredging vessel ang ilalim ng dagat habang umaangat ang itim na buhangin at lumalabo ang tubig sa karagatan.
Iginiit ng PPSE na hindi simpleng paghuhukay ang nagaganap kundi malawakang offshore mining operations na maaaring magdulot ng matinding pinsala sa yamang-dagat at mga baybaying komunidad sa loob ng maraming taon.
Ayon pa sa grupo, pinipinsala ng operasyon ang tirahan ng mga isda at iba pang lamang-dagat, ginagambala ang mga pook-pangisdaan, at nagdudulot ng polusyon, ingay, at panganib sa kabuhayan ng mga mangingisda.
Binanggit din ng PPSE ang iba pang banta sa Lingayen Gulf kabilang ang Labrador Nuclear Power Plant at waste-to-energy incinerator project sa Dagupan na maaaring makadagdag sa pinsala sa kalikasan sa lalawigan.
“Habang patuloy na kumikita ang mga dayuhan at nasa kapangyarihan, ordinaryong mangingisda at mamamayan naman ang pinagkakaitan ng karapatan sa isang masaganang dagat sa ngalan ng pekeng pag-unlad na hindi nakaugat sa interes ng nakararami,” giit ng PPSE.
Kasabay nito, nanawagan ang grupo sa mga lokal at pambansang ahensya ng pamahalaan na agarang ihinto ang offshore mining operations at papanagutin ang mga responsable sa mapaminsalang pagmimina sa karagatan.
Iginiit ng PPSE na ang sama-samang pagkilos ng mamamayan ay mahalaga upang mapangalagaan ang karagatan, kabuhayan, at likas na yaman laban sa dayuhang pandarambong at mapaminsalang proyekto.
“Dahil gaya na lamang ng matagumpay na paghinto ng pagpapatayo sa ikalawang Sual Coal Power Plant at pagmimina sa mga kabundukan ng Dupax Del Norte sa Nueva Vizcaya, walang imposible sa diwa ng sama-samang pagkilos ng mamamayan para sa ating karapatan at kabuhayan.” ayon sa PPSE.
Nakasaad sa Laudato Si’ ni Pope Francis na ang kalikasan ay hindi lamang pinagkukunan ng kita kundi isang biyayang dapat pangalagaan para sa kapakanan ng kasalukuyan at susunod na mga henerasyon.
