14,028 total reads
Umapela ng pagkakaisa at kapayapaan si Manila Archbishop Jose Cardinal Advincula sa gitna ng umiiral na pagkakahati-hati sa lipunan.
Ito ang panawagan ng kardinal sa nalalapit na pagdiriwang ng Dakilang Kapistahan ng Kamahal-mahalang Puso ni Hesus sa June 12 na kasabay ngayong taon ng paggunita sa Araw ng Kalayaan.
Sa kanyang mensahe para sa Buwan ng Kamahal-mahalang Puso ni Hesus, hinikayat ng kardinal ang mga mananampalataya, pamilya, parokya, paaralan, at mga komunidad na muling italaga ang kanilang sarili sa Puso ni Kristo.
Ayon kay Cardinal Advincula, nananatiling mahalagang sandigan ang pananampalataya sa panahon ng mga hamon at pagkakawatak-watak sa lipunan.
“In these times marked by uncertainty, conflict, and deep political divisions, we are called to return to the Heart of Jesus, the true source of peace, compassion, and unity,” pahayag ni Cardinal Advincula sa Radyo Veritas.
Binigyang-diin din ni Cardinal Advincula ang kahalagahan ng pagpapanatili ng pagkakapatiran at paggalang sa kabila ng magkakaibang paniniwala at pananaw sa pulitika.
“We pray as well for our beloved country, that amid differences in political views and convictions, we may never lose our sense of fraternity, respect, and common responsibility for the good of the nation,” ani ng kardinal.
Hinimok rin ng arsobispo ang mga mananampalataya na isabuhay ang debosyon sa Kamahal-mahalang Puso ni Hesus sa pamamagitan ng pagkakawanggawa, pagpapakumbaba, pagpapatawad, at pagmamalasakit sa mga mahihirap, mga nagdurusa, at mga nakakaramdam ng pag-iisa at pagkalimot.
Nanawagan din si Cardinal Advincula ng panalangin para sa kapayapaan sa buong mundo at para sa mga pinuno ng mga bansa upang manaig ang dayalogo at matigil ang karahasan.
Dalangin ng kardinal na nawa’y maghari ang Kamahal-mahalang Puso ni Hesus sa puso ng bawat tao, sa bawat tahanan, at sa buong bayan.
