370 total views
Nilinaw ni Caritas Philippines executive director, Fr. Carmelo ‘Tito’ Caluag, ang desisyong ipatanggal ang ikatlong episode ng programang YSpeak 2.0 at ihinto ang pagpapalabas nito sa free television.
Sa kanyang pahayag, sinabi ni Fr. Caluag na siya, bilang kinatawan ng Caritas Philippines at producer ng programa, ang humiling na alisin ang naturang episode na unang ipinalabas noong May 23.
“It was a difficult decision to make, but there are internal editorial guidelines and basic values of Caritas Philippines I needed to consider,” ayon kay Fr. Caluag.
Ipinaliwanag ng pari na kanyang isinasaalang-alang ang mga patakarang editoryal at pangunahing pagpapahalaga ng organisasyon, gayundin ang iba pang mga salik na natalakay sa mga taong may kaugnayan sa usapin.
Nilinaw din ni Fr. Caluag na ang hindi pagpapalabas ng ikaapat na episode sa ALLTV2 noong May 30 ay bahagi rin ng kanyang naging desisyon.
Ayon sa opisyal ng simbahan, nais ng Caritas Philippines na higit pang palakasin ang presensya nito sa mga online platform upang mas maabot ang mga kabataang pangunahing tagasubaybay ng programa.
“YSpeak and YSpeak 2.0 were created to always be a safe space for the Filipino youth and will continue to strive to be such. Yes, we want our youth to have the platform to speak the truth with courage, but also to take all things into consideration,” giit ni Fr. Caluag.
Binanggit din ng pari na nakipagpulong siya sa mga host ng programa upang talakayin ang mga naging kaganapan at mabigyan sila ng pagkakataong makatulong sa pagdedesisyon sa mga susunod na hakbang.
Hiniling naman ni Fr. Caluag ang patuloy na panalangin at suporta ng publiko para sa YSpeak community habang pinag-aaralan ang magiging direksyon ng programa.
