399 total views
Opisyal ng binuksan ng Radyo Veritas ang nominasyon para sa Veritas Truth Awards 2026.
Ang Veritas Truth Awards 2026 ay inilunsad ng Radyo Veritas katuwang ang Public Affairs Ministry ng Archdiocese of Manila at C.A.R.E. upang kilalanin ang mga indibidwal at organisasyong nagsusulong ng katotohanan, pananagutan, transparency, at integridad sa kanilang paglilingkod sa lipunan
Layunin ng parangal na mabigyang pagkilala ang mga huwarang lider, lingkod-bayan, at mga samahan o institusyong nagpakita ng katatagang moral at dedikasyon sa pagtataguyod ng mabuting pamamahala at katarungan.
Inaanyayahan ng pamunuan ng Radyo Veritas ang publiko na magnomina at magmungkahi ng mga indibidwal o organisasyong nagsisilbing inspirasyon sa pagtataguyod ng tama at makatarungan sa kani-kanilang larangan.
“May kilala ka bang tao o organisasyong nagsisilbing huwaran ng katotohanan at mabuting pamumuno? Iparangal natin ang kanilang natatanging ambag at dedikasyon sa pagtataguyod ng tama at makatarungan.” Bahagi ng paanyaya ni Radyo Veritas President and CEO Fr. Roy Bellen.
Tatanggap ng nominasyon para sa Veritas Truth Awards 2026 hanggang Hunyo 30, 2026 at daraan ang lahat ng nominado sa masusing pagsusuri ng piling lupon ng mga hurado.
Umaasa ang pamunuan ng Radyo Veritas na sa pamamagitan ng Veritas Truth Awards 2026 ay higit pang mahikayat ang mamamayan na kilalanin at suportahan ang mga taong nagsusulong ng katotohanan at mabuting pamamahala bilang mahalagang ambag sa paghubog ng isang makatarungan at responsableng lipunan.
