7,097 total views
Binigyang-diin ni Iba Bishop Bartolome Santos Jr., vice chairman ng CBCP Episcopal Commission on Youth, ang pangangailangang tugunan ng Simbahan ang lumalawak na impluwensya ng artificial intelligence o AI sa buhay ng mga kabataan na nagdudulot ng krisis sa paglalakbay pananampalataya, pakikipagkapwa at pagiging malapit sa Diyos.
Sa kanyang pagninilay sa ikalawang araw ng 1st National Youth Directors Assembly sa misang isinagawa sa Sagrada Familia Chapel sa Quezon City, tinukoy ng obispo ang teknolohiya bilang isa sa mga pangunahing hamon na kinakaharap ng mga kabataan sa kasalukuyan.
“The next enemy we have to make as our footstool is the crisis brought by technology—the crisis of AI, the crisis of accompaniment, and the crisis of intimacy,” ayon kay Bishop Santos.
Ipinaliwanag ng obispo na maging ang AI mismo ay maaaring magturo kung paano naaapektuhan ng teknolohiya ang ugnayan ng tao sa kapwa.
“Even if you ask AI what brought about the crisis of intimacy, the first reason is technology—too much time spent with AI lessens the personal relationships and intimacy felt by the heart,” ani Bishop Santos.
Nagbabala rin siya na mas maraming oras na ang ginugugol ng mga kabataan sa AI at digital platforms kaysa sa kanilang pamilya at mga kaibigan.
“We know that our youth spend their time with AI more than with their parents, family, and friends,” saad ng obispo.
Binigyang-diin ni Bishop Santos na tungkulin ng Simbahan na samahan at gabayan ang mga kabataan upang hindi mapalitan ng teknolohiya ang tunay na pakikipag-ugnayan sa Diyos at kapwa.
“The crisis of accompaniment happens when loneliness and depression are dealt with by AI rather than through a close personal relationship with God and family.”
Hinimok ng obispo ang mga youth ministers at mga lingkod ng Simbahan na maging “ka-manlalakbay” ng mga kabataan sa gitna ng mga hamon ng makabagong panahon sa gabay ng Banal na Espiritu.
Isinagawa ang kauna-unahang National Youth Directors Assembly na dinaluhan 100 mga youth directors at youth ministers mula sa 62 diyosesis sa bansa at 15 Federation of National Youth Organizations.
