7,145 total views
Tiniyak ni Cubao Bishop Elias Ayuban Jr. ang pangangailangang ituon ang youth ministry sa pagpapalalim ng pakikipagtagpo ng mga kabataan kay Hesukristo sa halip na sa mga programa at aktibidad lamang.
Sa isinagawang First National Youth Directors Assembly ng CBCP Episcopal Commission on Youth, sinabi ng obispo na ang tunay na pundasyon ng paglilingkod sa kabataan ay ang pag-akay sa kanila sa mas malalim na ugnayan sa Panginoon.
“Youth ministry begins not with activities but with an encounter. Before young people need programs, they need Christ,” ayon kay Bishop Ayuban.
Binigyang-diin ng obispo na sa gitna ng mga hamon tulad ng social media, misinformation, suliraning pangkaisipan at emosyonal, kawalan ng katiyakan sa ekonomiya, migrasyon, pagkakawatak-watak ng pamilya at lumalawak na kawalang-interes sa pananampalataya, mahalagang matulungan ang mga kabataan na makatagpo si Kristo at maging mga misyonerong alagad.
“The question before us is not simply: ‘How do we attract young people?’ The deeper question is: ‘How do we help young people encounter Jesus Christ and become missionary disciples?’” ani ng obispo.
Hinimok din ni Bishop Ayuban ang mga youth directors at ministers mula sa 62 na diyosesis sa bansa at 15 miyembro ng Federation of National Youth Organizations na higit pang pagtuunan ang paggabay sa espiritwal na buhay ng mga kabataan.
Ayon sa obispo, ang pananampalataya ay hindi lamang koleksyon ng mga aral kundi isang buhay na pakikipag-ugnayan sa Panginoon na dapat maipakilala sa mga kabataan sa pamamagitan ng patotoo at pagmamahal.
“You are not merely managing programs. You are accompanying souls. This mission requires more than competence. It requires love,” saad ni Bishop Ayuban.
