295 total views
Mariing kinondena ng Laudato Si’ Movement Pilipinas (LSM Pilipinas) ang pagputol ng mga puno sa Quirino Avenue at Roxas Boulevard sa Maynila kaugnay ng Southern Access Link Expressway (SALEX) project ng San Miguel Corporation (SMC), kasabay ng panawagan para sa agarang pagtigil ng mga gawaing nakaaapekto sa kalikasan.
Nakipagkaisa ang LSM Pilipinas sa Caritas Philippines at iba pang civil society organizations sa paggiit na ang malawakang pag-alis ng mga puno ay isang seryosong usapin ng pangangalaga sa kapaligiran at karapatang pangkalikasan.
Binigyang-diin ng grupo na ang mga punong tinanggal at nakatakda pang alisin, na bahagi ng 617 orihinal na inaprubahan ng Department of Environment and Natural Resources (DENR), ay may mahalagang papel sa pagpapanatili ng balanseng ekolohiya sa lungsod ng Maynila.
“The massacre of the aforementioned trees is an act against the tender and affectionate love of God for them which we strongly denounce,” pahayag ng LSM Pilipinas.
Ayon sa LSM, ang mga puno sa kahabaan ng Quirino Avenue at Roxas Boulevard ay nakatutulong sa biodiversity, pagsipsip ng carbon emissions, pagpapababa ng init sa lungsod, pagpapabuti ng kalidad ng hangin, at pagbibigay proteksyon laban sa pagbaha.
Iginiit ng grupo na ang patuloy na pagputol ng mga puno ay dapat tingnan hindi lamang bilang usaping pang-imprastruktura kundi bilang usaping may direktang epekto sa kalikasan, kalusugan ng publiko, at kalidad ng buhay sa lungsod.
Nanawagan din ang LSM Pilipinas sa SMC, DENR, Pamahalaang Lungsod ng Maynila, at pambansang pamahalaan na suriin muli ang mga proyekto na may malawakang epekto sa kalikasan at tiyaking may mas bukas na konsultasyon sa mga apektadong sektor.
“We call on SMC, the DENR, the Local Government of Manila, the Philippine National Government and all people of goodwill, to respect and uphold the rights of every tree, of every creature, and to promote the legal Rights of Nature,” ayon sa grupo.
Kasabay nito, binigyang-pansin din ng grupo ang panawagan ng kabataan at environmental advocates na isulong ang mas matibay na pananagutan at pangangalaga sa mga natitirang luntiang espasyo sa mga lungsod.
Nanindigan ang LSM Pilipinas na ang tunay na pag-unlad ay hindi dapat nakabatay sa kapinsalaan ng kalikasan, kundi sa balanseng pag-unlad na isinasaalang-alang ang kapaligiran at kapakanan ng susunod na henerasyon.
“We demand ecological and intergenerational justice… stop all projects that are destructive to people and nature; and involve all sectors of society in seeking and implementing a truly sustainable and integral development,” saad ng LSM Pilipinas.
