5,829 total views
Binigyang-diin ni Fr. Edwin Gariguez, convenor ng Protect Verde Island Passage Network at Executive Director ng Social Action Center ng Diocese of Calapan, ang pakikiisa sa mga katutubo sa pagdiriwang ng World Environment Day.
Sa kanyang mensahe, kinilala ni Fr. Gariguez ang mahalagang tungkulin ng mga katutubo sa pangangalaga sa kalikasan, lalo na sa kanilang likas na kaalaman at matagal nang ugnayan sa kalikasan sa kanilang mga lupaing ninuno.
“On this World Environment Day, we stand in solidarity with Indigenous Peoples, recognizing their inherent rights to their ancestral domains, their wisdom in caring for the Earth, and their vital role as advocates for the Rights of Nature and ecological justice,” pahayag ni Fr. Gariguez.
Iginiit ng pari na mahalagang kilalanin ang ambag ng mga katutubo sa pagsusulong ng katarungang pangkalikasan, lalo na sa gitna ng lumalalang banta sa mga mahahalagang likas na yaman at sistema ng kalikasan sa bansa.
Hinimok din niya ang mas malawak na pagkilos para sa pangangalaga ng kalikasan at pagkilala sa karapatan ng kalikasan bilang bahagi ng mas malawak na adbokasiya para sa katarungang pangkalikasan.
Binigyang-diin ni Fr. Gariguez na hindi maaaring ihiwalay ang pangangalaga sa kalikasan sa karapatan at kapakanan ng mga komunidad na matagal nang nagsisilbing tagapangalaga ng kapaligiran.
Nauna nang nanawagan si Fr. Gariguez ng mas malalim na pananagutan sa kalikasan sa pamamagitan ng ecological justice at integral ecology, kung saan binibigyang-halaga ang ugnayan ng tao, kalikasan, at kabutihang panlahat.
Ang World Environment Day, na ipinagdiriwang tuwing Hunyo 5, ay itinatag ng United Nations noong 1972 bilang pandaigdigang plataporma para sa pagsusulong ng kamalayan at pagkilos sa pangangalaga ng kalikasan.
