3,906 total views
Hinimok ni Stella Maris CBCP Bishop Promoter Antipolo Bishop Ruperto Santos ang mga kasapi ng Stella Maris–Philippines na manatiling matatag sa kanilang misyon ng paglilingkod sa mga marino, mangingisda, port workers, at kanilang mga pamilya sa gitna ng iba’t ibang hamon na kinakaharap ng sektor.
Sa isinagawang National Consultation-Meeting ng Stella Maris–Philippines sa Antipolo City, binigyang-diin ng obispo na tulad ng mga paglalayag sa dagat, hindi maiiwasan ang mga pagsubok o suliranin sa buhay at ministeryo ngunit sa tulong ng Diyos at pamamagitan ng Mahal na Birhen ng Antipolo ay malalampasan ang mga ito.
“It is a profound blessing for us to hold our national consultation-meeting here in Antipolo, the home of our beloved Blessed Virgin Mary, whom we lovingly invoke as the Mapaghimalang Birhen ng Antipolo. Here, under her maternal embrace and protection, we gather as one Stella Maris family: renewed, strengthened, and inspired.
We are truly happy and honored to welcome you all,” ayon sa mensahe ni Bishop Santos.
Ayon pa kay Bishop Santos, ang Banal na Mag-anak ay nagsilbing halimbawa ng pagtitiis, pagtitiwala, at paglalakbay sa gitna ng kawalang-katiyakan, karanasang maihahalintulad sa buhay ng maraming seafarers at migrant workers sa kasalukuyan.
Iginiit ng obispo na mahalagang ipagpatuloy ng Stella Maris ang pag-akay, pakikiisa, at pagdamay sa mga taong nabubuhay at nagtatrabaho sa dagat upang matiyak na hindi sila nag-iisa sa kanilang mga hamon at sakripisyo.
“In the same way, we are invited to offer our own victories over trials, our endurance through hardships, and our perseverance in ministry. Every challenge we overcome becomes an offering of love. Every sacrifice becomes a prayer. Every act of service becomes a participation in Mary’s own mission of bringing Christ to others. Offer your journey to God,” bahagi pa ng mensahe ni Bishop Santos sa pagtitipon ng Stella Maris Philippines.
Kaugnay nito, paulit-ulit na binigyang-diin ni Pope Francis noon na ang mga marino at migrant workers ay mahalagang bahagi ng pandaigdigang komunidad at nararapat na makatanggap ng pagkalinga, pagkilala, at proteksyon.
Hinikayat din niya ang Simbahan na maging tanda ng pag-asa at pakikipagkapwa sa mga taong malayo sa kanilang mga tahanan at pamilya.
