940 total views
Binigyang-diin ni Caceres Archbishop Rex Andrew Alarcon na ang tunay na kalayaan ay hindi lamang paggunita sa kasarinlan ng bansa kundi maging ang kakayahang piliin ang mabuti, totoo, at makatarungan.
Ito ang mensahe ng arsobispo sa pagdiriwang ng ika-128 Araw ng Kalayaan ng Pilipinas sa June 12.
Sinabi ng arsobispo na ang hamon sa kabataan at mga youth leaders ay ang patuloy na paghubog ng puso, kaisipan, at wastong pag-unawa sa kalayaan.
“We enjoy freedom when we have the truth. We enjoy freedom when we can make good choices. And, of course, we say that freedom is choosing the good,” pahayag ni Archbishop Alarcon sa Radyo Veritas.
Paliwanag ng arsobispo na ang ganap na kalayaan ay nakikita sa kakayahang pumili ng mabuti, magmahal, at maglingkod sa kapwa.
“We define freedom as the fullness of freedom, to be able to choose what is good for us, to choose to love, to choose to serve,” ani Archbishop Alarcon.
Hinimok din nito ang mga pastol at maging ang mga magulang na paigtingin ang paghubog sa kaisipan ng mga kabataan upang patuloy na hanapin, itaguyod, at panindigan ang katotohanan.
“Because when we choose lies, when we choose evil, that leads to self-destruction,” babala ng arsobispo.
Bilang chairman ng CBCP Episcopal Commission on Social Communication, binigyang-diin din ni Archbishop Alarcon ang responsableng paggamit ng social media, makabagong teknolohiya, at iba’t ibang digital platforms, at ang tiyaking naipapahayag ang katotohanan tungo sa pagkamit ng kalayaan.
“As we use these tools, social media, and the new tools that we have, it is very important to use these in freedom, in truth,in goodness, and in beauty,” saad ng arsobispo.
Kinilala rin ng arsobispo ang kahirapan, kakulangan sa edukasyon, at limitadong akses sa impormasyon bilang ilan sa mga hadlang sa tunay na kalayaan, kaya’t nanawagan ito ng pagtutulungan upang mapalawak ang kamalayan at pagkakataon para sa lahat.
Umaasa si Archbishop Alarcon na sa gitna ng iba’t ibang krisis na kinakaharap ng lipunan ay mananaig ang katotohanan, kabutihan, at pagmamalasakit sa kapwa upang higit pang maisabuhay ng mga Pilipino ang tunay na diwa ng kalayaan.
