14,934 total reads
Naniniwala ang mga mambabatas ng Makabayan bloc na ang pangunahing dahilan ng ipinatawag na ‘special session’ ni Pangulong Ferdinand Marcos Jr., ay may kaugnayan sa usapin ng leadership change ng Senado.
Ayon sa inilabas na pahayag ng Mabayan bloc, malinaw na nakatuon ang usapin sa naging kaguluhan sa Senado na kung sino ang mayorya at minorya at hindi tungkol sa mga nakabinbing panukala.
“Everyone knows this is about the Senate leadership change more than any legislative measure,” ayon sa pahayag.
Sa kabila nito, nanawagan ang mga mambabatas sa publiko na higit pang maging mapagbantay, lalo na sa anumang pagpapalit ng liderato sa Senado para makalusot o makaiwas sa pananagutan ang mga senador na may kinahaharap na alegasyo ng korapsyon.
“Any leadership change should not be an occasion to get off the hook senators who face corruption charges,” ayon sa Makabayan bloc.
Gayundin ayon sa mga kongresista ang posibleng pag-usad ng pinahinang bersyon ng anti-political dynasty bill na maaring lamang mas magbigay daan sa mga umiiral na political dynasty sa bansa.
“We likewise warn the public on the passage of the watered-down anti-dynasty bill which is actually a bill legitimizing dynasties,” ayon pa sa pahayag.
Ang Makabayan bloc ay binubuo ng mga mambabatas mula sa progresibong partylist na kinabibilangan nina Representatives Antonio Tinio (ACT Tearchers), Sarah Elago (Gabriela) at Renee Co (Kabataan).
Una na ring ipinag-utos ni Pangulong Ferdinand Marcos Jr. ang pagsasagawa ng ‘special session’ sa Kongreso na itinakda bukas, June 17.
Ayon sa Proclamation No. 1318, layunin ng hakbang na pabilisin ang pagpasa ng mga panukalang batas na magpapalakas sa social protection programs ng pamahalaan at magbibigay ng dagdag na suporta sa mga Pilipinong apektado ng mga kalamidad at hamon sa enerhiya.
Ang Special Session ng Kongreso, ay isang natatanging pagpupulong ng Senado at Kamara na ipinapatawag ng Pangulo upang agarang talakayin at aksyunan ang mahahalagang usapin kahit naka-recess ang Kongreso.
