356 total views
Umaasa si Pangulong Ferdinand R. Marcos Jr. na tuluyan nang matatapos ang tensyon sa Middle East kasunod ng napaulat na ceasefire agreement sa pagitan ng Estados Unidos at Iran.
Sa isang joint press briefing kasama si German President Frank-Walter Steinmeier, sinabi ng Pangulo na malaking ginhawa para sa maraming bansa ang posibleng kasunduan upang wakasan ang hidwaan.
“That is what we have been hoping for since the day after the war started. We hope, we pray, that this is the case, that it is over, the war is over, and it will be a lasting peace,” ayon kay Pangulong Marcos.
Ayon sa Pangulo, ramdam sa buong mundo, kabilang ang Pilipinas, ang epekto ng sigalot, lalo sa presyo ng langis at sa pangkalahatang kalagayan ng ekonomiya.
Giit ni Marcos, mahalaga na matuloy ang kasunduan upang makapagbigay-daan sa pagbangon ng ekonomiya at mabawasan ang epekto ng krisis sa enerhiya.
Umaasa rin ang punong ehekutibo na magiging tuloy-tuloy ang proseso at hindi na muling mauwi sa panibagong tensyon ang sitwasyon sa rehiyon.
Ang pahayag ay kasabay na rin naging pagbisita ng Pangulo ng Germany sa Pilipinas.
Kabilang din sa tinalakay sa pagbisita sa Malacañan ni Steinmeier ang usapin sa kalakalan, investment, at renewable energy.
Kasunod nito ay ang bilateral meeting sa pagitan ni Pangulong Marcos at President Steinmeier, kung saan ay inaasahang mapag- uusapan ang tungkol sa pagnenegosyo, pamumuhunan, depensa, maritime cooperation, renewable energy at iba pang larangan na may kinalaman sa kooperasyon ng Pilipinas at Germany.
Ito ang kauna-unahang state visit ng isang German head of state sa Pilipinas matapos ang mahigit anim na dekada, mula nang dumating sa bansa si dating German President Heinrich Lübke noong 1963
