520 total views
Ibinahagi ng Family of Saint Sharbel Philippines ang mga gawain para sa kapistahan ni San Sharbel Makhlouf sa July 24, na tampok ang pakikibahagi ng ilang pinuno ng Simbahang Katolika sa Pilipinas sa mga banal na misa at debosyon bilang paghahanda sa kapistahan ng kilalang “milagrosong monghe ng Lebanon.”
Isasagawa ang Misa nobenaryo mula July 15 hanggang 23, ganap na alas-6 ng gabi, sa Our Lady of the Assumption Parish sa Leveriza, Malate, Manila, kung saan kasalukuyang nakadambana ang relikya ng banal.
Bilang bahagi ng nobenaryo, pangungunahan ni Apostolic Nuncio to the Philippines, Archbishop Charles Brown, ang banal na misa sa July 19 ganap na alas-10 ng umaga.
Isasagawa rin sa July 22 ang Mass for the Sick with Blessing and Distribution of the Holy Oil of St. Sharbel sa alas-8 ng umaga, kung saan inaasahang dadalo ang maraming deboto upang ipagdasal ang kagalingan ng mga may karamdaman.
Sa araw ng kapistahan sa July 24, pangungunahan ni Cardinal Luis Antonio Tagle, Pro-Prefect ng Dicastery for Evangelization, ang Solemn Pilgrim Mass sa Manila Cathedral ganap na alas-9 ng umaga.
Susundan ito ng banal na misa sa alas-12 ng tanghali sa Our Lady of the Assumption Parish na pamumunuan ni Fr. Dave Concepcion, chaplain ng Sto. Niño de Paz Greenbelt Chapel.
Magkakaroon din ng Holy Hour at Kumpisal sa alas-3 ng hapon, bago ang pagtatapos ng pagdiriwang ng Fiesta Mass sa alas-6 ng gabi, na pangungunahan ni Balanga Bishop Rufino Sescon Jr.
Sa Pilipinas, patuloy na lumalawak ang debosyon sa santo, lalo na sa mga humihiling ng kagalingan, espirituwal na lakas at pag-asa.
Si San Sharbel Makhlouf ay isang paring Maronite mula sa Lebanon na isinilang noong 1828.
Inialay ang kanyang buhay sa panalangin, katahimikan, pag-aayuno, at paglilingkod sa Diyos bilang isang ermitanyo.
Pumanaw ang santo noong 1898, at kasunod ng kanyang pagpanaw ay maraming himala at kagalingan ang iniugnay sa kanya.
Idineklara siyang santo ni Pope St. Paul VI noong 1977.
