8,054 total reads
Nanawagan ang Philippine Misereor Partnership Inc. (PMPI) sa pamahalaan na tiyaking ang mga bagong pamumuhunan sa bansa, kabilang ang mga mula sa Canada, ay magsisilbi hindi lamang sa paglago ng ekonomiya kundi maging sa pangangalaga sa kalikasan, karapatang pantao, at kapakanan ng mga komunidad.
Ito ang binigyang-diin ng PMPI kasunod ng pahayag ng pamahalaan na bukas ang Pilipinas sa mas maraming negosyo at investment partnerships, kabilang ang pagmimina at mineral processing na itinuturing na may malaking potensyal sa paglago ng ekonomiya.
Ayon kay PMPI National Coordinator Yolanda Esguerra, may pananagutan ang pamahalaan na tiyaking ang mga kasunduang pang-ekonomiya ay hindi magdudulot ng pagkasira ng kalikasan at paglabag sa karapatan ng mga katutubo at lokal na komunidad kapalit ng panandaliang pakinabang.
“An architect who refuses to listen to the people who will use the building is bound to design one that eventually fails. Governance is no different. Foreign policy cannot be built around the preferences of a powerful few while those who bear the environmental and social costs are treated as afterthoughts,” pahayag ni Esguerra.
Binigyang-diin din ng organisasyon na napatunayan na sa mga nakalipas na malawakang proyekto ng pagmimina ang pagkakahati ng mga komunidad, pagkasira ng kalikasan, at paglabag sa karapatan ng mga katutubo at environmental defenders.
Iginiit din ng PMPI na ang tunay na pag-unlad ay hindi lamang nasusukat sa dami ng mga pamumuhunan o kasunduang nalalagdaan, kundi sa pangangalaga sa kalikasan, paggalang sa karapatan ng mga pamayanan, at kapakanan ng mga susunod na henerasyon.
Ayon kay Esguerra, dapat lamang tanggapin ng Pilipinas ang mga pamumuhunang lumilikha ng disenteng trabaho at tunay na nakatutulong sa pambansang kaunlaran nang hindi isinasakripisyo ang tao at kalikasan.
“As we pursue partnerships and investments, we must also ensure that they strengthen, rather than diminish, the ecosystems and communities upon which our nation’s future depends,” dagdag ni Esguerra.
Sa pananaw ng Simbahan, ang pag-unlad ay hindi dapat isulong sa kapinsalaan ng tao at kalikasan, kundi maging daan upang higit na mapangalagaan ang buhay, dignidad, at ang nag-iisang tahanan.
