14,413 total reads
Nanawagan ang kinatawan ng labor sector sa Department of Labor and Employment na tugunan ang legal na basehan na hadlang sa pagpapatupad ng wage order na 85-pisong minimum wage increase sa mga manggagawa National Capital Region.
Iginiit ng Trade Union Congress of the Philippines o TUCP Partylist na hindi sapat ang bagong Administrative Order No. 264 ng DOLE na nakatuon sa pagpapatupad, pagmamanman at enforcement ng mga wage order dahil ang kailangan ng mga manggagawa ay totoong wage hike.
Sinabi ng TUCP na dapat kilalanin ni DOLE secretary Francis Tolentino na “supervening event” ang pagkaantala ng implementasyon ng wage order.
Hinimok naman ng NAGKAISA labor coalition ang DOLE at Office of the Solicitor General na aktibong ipaglaban at ipawalang bisa na ang temporary restraining order o TRO na kasalukuyang pumipigil sa pagpapatupad ng NCR Wage Order No.27.
Binigyang-diin ng NAGKAISA na bawat araw na naaantala ang wage hike ay may direktang epekto sa kita ng mga manggagawa.
Nanawagan din ang NAGKAISA na lutasin ang “legal loophole” na nagpapahintulot sa mga employer na dalhin sa korte ang mga wage order at humingi ng injunction, na maaaring magresulta sa matagal na pagkaantala sa pagpapatupad nito.
Iginiit ng mga labor organization na hindi dapat mauwi sa simpleng pagmamanman at pagpapatupad ng wage orders ang polisiya ng pamahalaan, lalo na sa harap ng tinatawag nilang wage crisis.
Nakasaad naman sa mga katuruan ng ensiklikal na Rerum Novaarum at Laborem Excercens nina Pope Leo XIII at Saint John Paul II na dapat ipatupad ng pamahalaan ang makatarungang antas ng suweldo sa mga manggagawang nakabatay sa kanilang pinaghirapan at lagay ng ekonomiya.
