485 total reads
Hinimok ng Parents Advocacy for Children’s Education (PACE) ang mga magulang na maging mas mapagmatyag sa mga textbook at iba pang learning materials na ginagamit ng kanilang mga anak, kasunod ng mga tanong sa paglalagay ng konsepto ng gender affirmation sa mga kagamitang pang-edukasyon.
Sa panayam sa programang Veritas Pilipinas, binigyang diin ni PACE Founding Chairman Dr. Rey Vargas na mahalagang magkaroon ng masusing pag-uusap sa pagitan ng mga magulang, paaralan at mga gumagawa ng educational materials tungkol sa mga sensitibong usapin na may kaugnayan sa sexuality at gender.
Aniya, partikular na dapat isaalang-alang ang pangunahing papel ng mga magulang sa paggabay sa kanilang mga anak hinggil sa mga usaping ito.
“Kung sakaling ituturo natin ‘yung sekswalidad, ang priority dito, gaya ng sinabi nung Church documents natin, magulang po ang una dapat nagtuturo pagdating diyan.” Bahagi ng pahayag ni Vargas sa Radyo Veritas.
Kinuwestiyon din ni Vargas ang paglitaw ng konsepto ng gender affirmation sa ilang educational materials at sinabing dapat itong suriin sa konteksto ng mga pananaw at dokumento ng Simbahan hinggil sa pagkakaiba ng lalaki at babae.
“Kaya nagtataka nga po kami paano po biglang naisingit ‘yung gender affirmation, which I think the point is it is contrary to the Church document na ginawa ni Pope Francis nung 2014.” Dagdag pa ni Vargas.
Binigyang-diin niya na mahalagang maging bahagi ang mga magulang sa mga usaping may direktang epekto sa paghubog at edukasyon ng kanilang mga anak, lalo na sa mga sensitibong konsepto na ipinapakita sa mga textbook.
“Paanong napunta ‘yung gender affirmation, paanong biglang hinajack ng educational system natin, where in fact it’s supposed to be the first and fundamental obligation or responsibility of the parents?” Ayon kay Vargas.
Isa sa mga pangunahing tanong ng grupo ng mga magulang, ayon kay Vargas, ay kung ano ang layunin ng pagsasama ng gender affirmation sa mga educational materials at kung paano ito napasok sa sistema ng edukasyon.
Binigyang-diin din ni Vargas ang kahalagahan ng pagtingin sa edad at antas ng pag-unawa ng mga batang gagamit ng mga textbook, lalo na sa mga unang baitang.
“Kung ibabase po natin doon sa specifically ‘yung pahina ng libro, una-una, paano ba naisip ng Grade 1 ‘yung pusong babae saka pusong lalaki, ano po? Paano po nila naisip ‘yon kung unless ipapasok mo ‘yon sa kanilang kaisipan o kamalayan?” Ani Vargas.
Para kay Vargas, naging pagkakataon din ang isyu upang mas maging mulat ang mga magulang sa kanilang papel sa pagsubaybay sa mga materyales na ginagamit sa paaralan.
Ipinaalala niya na hindi lamang dapat umasa ang mga magulang sa mga impormasyong ibinibigay ng paaralan, kundi maaari rin silang maging aktibong bahagi sa pagsusuri ng mga kagamitang ginagamit sa pagkatuto ng kanilang mga anak.
“Siguro ang isang role natin dito, una sa lahat sa mga magulang, ay magkaroon din sana tayo ng obligasyon na busisihin ‘yung mga textbook na ginagamit ng mga estudyante natin.” Dagdag pa ni Vargas.
Ayon kay Vargas, mahalaga ring maging alerto ang mga magulang sa mga textbook bago pa man ito malawakang magamit sa mga paaralan, at magsagawa ng pagsusuri sa nilalaman ng mga ito.
“Mabuti ho at napansin ‘yan. Siguro panawagan na lang tayo na sana maging alerto din tayo, i-monitor din natin ‘yung mga textbook ng mga anak natin.” Ayon pa kay Vargas.
Sa gitna ng mga diskusyon tungkol sa gender at sexuality education, nanawagan ang PACE ng mas aktibong pakikilahok ng mga magulang sa edukasyon ng kanilang mga anak at sa pagsusuri ng mga kagamitang ginagamit sa kanilang pag-aaral.
Kaugnay nito, itinuturing ng Simbahan ang mga magulang bilang pangunahing tagapagturo at tagahubog ng kanilang mga anak, habang mahalaga rin ang papel ng paaralan sa pakikipagtulungan sa pamilya.
Sa bahagi ng Simbahan ang layunin ng edukasyon ay hindi lamang maghatid ng impormasyon kundi tumulong sa holistic na paghubog ng bata sa katotohanan, kabutihan at pananagutan.
