1,607 total reads
Hinimok ng mga nagwagi sa 13th St. Paul National Bible Quiz National Championship ang kapwa kabataan na maglaan ng oras sa pagbabasa ng Bibliya upang mapalalim ang kanilang pananampalataya at maisabuhay ang mga aral mula sa Salita ng Diyos.
Kabilang sa mga nagwagi bilang champions sina Mary Luz Cabasisi at Jinimay Pardillo ng Sisters of Mary School – Girlstown, Inc., Talisay, Cebu, habang 1st placers naman sina Lee C. Begnotaya at Christian Joseph B. Pateno ng Sisters of Mary School – Boystown, Inc., Minglanilla, Cebu.
Ayon kay Cabasisi, hindi dapat hanggang pag-aaral lamang ang pagbabasa ng Bibliya, kundi kailangang maisabuhay ang mga aral at pagpapahalagang natututuhan dito.
“We will just not study about the Bible, but instead, after studying, we will embody the virtues and the things that we get in the Bible. Inaanyayahan namin ang lahat na magbasa kayo ng Biblia. Kung hindi n’yo maintindihan, pwede naman tayo mag-ask ng help sa mga nakatatanda upang tayo ay turuan.” ayon sa panayam ng Radyo Veritas kay Cabasisi.
Nanawagan din siya sa mga kabataan na magsimulang magbasa ng Bibliya at humingi ng gabay sa mga nakatatanda kung may mga bahagi itong hindi nauunawaan.
Hinikayat naman ni Begnotaya ang mga estudyanteng nais sumali sa susunod na Bible Quiz na maglaan ng kahit isa hanggang dalawang oras para sa pagbabasa ng Bibliya.
“Kung gusto n’yong champion kayo, magbasa kayo ng Bible every one hour or two hours lang.” bahagi ng panayam ng Radyo Veritas kay Begnotaya.
Binigyang-diin din ni Begnotaya ang kahalagahan ng paggawa nang buong puso at pagtitiwala sa Diyos sa anumang kompetisyon o gawain.
Isinagawa ang 13th St. Paul National Bible Quiz National Championship noong Setyembre 12, 2026 sa Manila International Book Fair sa SMX Convention Center Manila, Pasay City, sa ilalim ng temang “Sowers of the Word: Channels of Peace.”
Ang patimpalak ay taunang evangelization ministry ng Society of St. Paul na naglalayong palalimin ang pagmamahal ng kabataan sa Banal na Kasulatan sa pamamagitan ng pag-aaral, friendly competition at pananampalataya.
