679 total reads
Hinimok ni Father Angel Cortez, OFM, executive secretary ng Conference of Major Superiors in the Philippines, ang mga taong-simbahan na gamitin ang social media bilang paraan ng pagpapalaganap ng pangangalaga sa kalikasan at pagsusulong ng mga isyung kinakaharap ng bansa.
Ayon kay Father Cortes, maaaring gamitin ng mga digital missionary ang kanilang mga cellphone at social media platforms sa pagbabahagi ng mga larawan at mensahe upang mamulat ang publiko at manawagan sa mga kinauukulan, lalo na sa harap ng patuloy na pagkasira ng kalikasan.
Binigyang-diin niya na ang tao ay hindi tagapagtaguyod o may-ari ng sangnilikha, kundi bahagi lamang ng lahat ng nilikha ng Panginoon. Kaya mahalagang ipagpatuloy ang pakikilahok ng Simbahan sa pangangalaga sa kalikasan, lalo na matapos ang mga baha at walang tigil na pag-ulan, at gamitin ang social media upang bigyang-prayoridad ang kalikasan.
“Napakaganda po dahil ginawa ito sa panahon ng Season of Creation, na humahamon sa atin bilang mga taong-simbahan na gamitin ang social media sa pagpapalaganap kung paano tayo naglaga sa kalikasan, Gamitin din natin itong platform para manawagan sa mga isyu na kinaharap ng ating bansa at imulat ang ating sarili sa pamamagitan ng ating mga cellphone,” ayon sa panayam ng Radyo Veritas kay Father Cortez.
Samantala, hinamon ni Dr. Nataša Govekar, Theological Pastoral Director ng Vatican Dicastery for Communication, ang mga Catholic digital content creators na maging tunay na saksi sa digital world at huwag ipaubaya sa artificial intelligence o teknolohiya ang mga bagay na nangangailangan ng tao at personal na pakikipag-ugnayan.
Ayon kay Govekar, mahalagang isabuhay ng mga digital missionary ang panawagang “from influencers to witnesses” at ang synodality sa paggamit ng digital platforms. Ibinahagi rin niya ang pananaw ng Vatican, kabilang ang pastoral reflection na “Towards Full Presence” na inilabas noong 2023, na tumatalakay sa papel ng mga content creators sa physical at digital contexts.
“My task was to bring to this assembly the Vatican perspective, sharing what was delivered through the pastoral reflection Towards Full Presence published in 2023. I tried to underline the words used in the subtitle of this assembly: ‘influencers to witnesses’ and ‘synodality’ connected to the digital mission because there is already a lot written in this document,” ayon sa panayam ng Radyo Veritas kay Govekar.
May temang “We Cannot but Speak” at “Influencers to Witnesses: Synodal Way for Digital Mission in Asia” ang ACDMA 2026.
