2,217 total reads
Hinimok ng Diocese of Borongan ang mga pari, relihiyosong komunidad at mga mananampalataya na magkaisa sa panalangin para sa paghirang ng bagong Obispo na mangunguna at gagabay sa lokal na Simbahan habang nananatili itong walang Obispo o nasa panahong sede vacante.
Sa isang pastoral na panawagan, hinikayat ni Rev. Fr. Jan Michael J. Gadicho, Diocesan Administrator ng Diocese of Borongan, ang lahat ng parokya, formation houses at mga pamayanang Katoliko na patuloy na manalangin upang pagkalooban ang diyosesis ng isang karapat-dapat na pastol.
“I strongly encourage all parishes, religious communities, houses of formation, and Catholic faithful across the Diocese of Borongan to join in spiritual solidarity as we persistently beg the Heavenly Father to send us a worthy shepherd to lead our diocese,” bahagi ng panawagan ni Fr. Gadicho.
Bilang bahagi ng panawagang ito, hiniling ni Fr. Gadicho na simulan sa Nobyembre 8, 2026, ang pagdarasal ng “Prayer for a New Bishop” o “Pag-ampo Para Hin Bag-o Nga Obispo” sa lahat ng simbahan at kapilya bago ang pangwakas na pagbabasbas sa bawat Misa tuwing Linggo.
Maaaring pangunahan ang panalangin ng pari, lector o commentator at maaari itong bigkasin sa wikang Ingles o Binisaya (Waray-Waray).
Sa hiwalay na bahagi ng kanyang panawagan, partikular na hiniling ng Diocesan Administrator ang aktibong pakikiisa ng buong diyosesis sa nasabing panalangin.
Matatandaang, itinalaga ng Santo Papa si Bishop Crispin Varquez sa Diocese ng Tagbilaran, matapos maglingkod sa Borongan sa loob ng 19 na taon.
