637 total reads
Umaasa ang Pro-Life Philippines Foundation na maliliwanagan ang mga mamamayang Filipino sa masamang epekto ng pagbabalik ng parusang kamatayan sa bansa.
Ayon kay Rita Linda Dayrit – President ng Pro-Life Philippines Foundation, ang pagbabalik ng Death Penalty sa bansa ay magsusulong lamang ng karahasan sa kasalukuyang modernong panahon na taliwas sa pag-unlad na matamasa ng bansa.
Giit ni Dayrit, napapanahon na upang magkaroon ng mas malalim na pag-unawa ang bawat mamamayan sa kahalagahan ng karapatang pantao at pagbibigay ng dignidad sa bawat nilalang.
“Sana po ma-recall ng ating mga kapanalig na itong Death Penalty is actually regression eh, re-progression towards barbaric violence na sana ngayong modern time mas habang nagiging modern ang ating society nagiging deeper ang understanding natin dun sa human rights at dignity na tayo ay hindi mga hayop…” pahayag Dayrit sa panayam sa Radyo Veritas.
Una nang nagpahayag ng mariing paninindigan ang mga human rights at pro-life advocates kasama ang Simbahang Katolika laban sa isinusulong na pagbabalik ng parusang kamatayan sa bansa na inaasahang sisimulan na ring dinggin sa Senado matapos na makapasa sa Kongreso.
Matatandaang noong nakalipas na taon sa botong 217 na Yes, 54 na No at isang nag-abstain ay tuluyan ng nakapasa sa ikatlo at huling pagbasa sa Mababang Kapulungan ng Kongreso ang House Bill 4727 o Death Penalty Bill na panukalang pagbabalik ng parusang kamatayan sa bansa.
Dahil dito, nananawagan ang Simbahang Katolika sa publiko upang bantayan ang mga Senador sapagkat bilang mga Katoliko ay nararapat na itaguyod at panindigan ng bawat isa ang dignidad at kasagraduhan ng buhay na ipinagkaloob ng Panginoon sa sangkatauhan.
