585 total views
Malalim na ang suliranin at naging kultura na sa Pilipinas ang “vote buying at vote selling” sa tuwing mayroong halalan.
Ayon kay Borongan Bishop Crispin Varquez, naging bahagi na ng sistema ng eleksyon ang suhulan o paggamit ng salapi ng mga kandidato upang makakuha ng boto.
Iginiit ng Obispo na hindi na kataka-taka kung bakit normal na at hindi itinuturing na kasalanan ng mga mamamayan ang pagtanggap ng pera kapalit ang boto.
“Kasi ang nangyari naging systemic na, kaya para sa mga tao hindi masama dahil sistema na daw. Kaya malalim ang problema na kailangan ng malalim na solusyon din para hinay-hinay na maka-realize ang mga tao, and I hope it will come people will yung tinatawag na ‘pangkalahatang pagka-untog’ ma-realize ng tao na that system is not really helpful for the country, degrading sa dignidad ng tao, naging system na, once it become a system for them it become, hindi na sila nagi-guilty kaya malaki ang trabaho pa, how to make them realize…”pahayag ni Bishop Varquez sa panayam ng Radio Veritas
Umaasa si Bishop Varquez na ituring na isang hamon sa lipunan ang ganitong sistema tuwing halalan upang muling maibalik at bigyang dangal ang sistema at estado ng politika sa bansa.
Samantala, batay sa isinagawang survey ng Social Weather Station o SWS sa pagtatapos ng 2015, nananatiling 50-posyento o katumbas ng 11.2-milyong pamilyang Pilipino ang nagsabing sila ay mahirap na kadalasang biktima ng vote buying at vote selling tuwing eleksyon.
