1,086 total views
Hiniling ni Rev. Fr. Niño Garcia – Parish Priest ng San Lorenzo Ruiz Parish sa Manicani island, Guian Eastern Samar, kay Pangulong Rodrigo Duterte ang tuluyang pagpapatigil sa pagmimina o ore mining sa Manicani at Homonhon Islands.
Ayon sa Pari, malaking dagok para sa mga lokal na residente na naninirahan lamang sa isang maliit na isla at lubhang nakadepende sa karagatan at kabundukan ang ang perwisyong idinudulot ng pagmimina.
“Para po dito sa amin sa isla ng Manicani, we are hoping na marinig sa pangulo ang tungkol sa mina. Para sa amin dito sa Manicani, gusto sana naming itigil ang pagmimina, sa mga maliliit na isla tulad ng isla ng Manicani, at isla ng Homonhon, kung saan ang primary na ikinabubuhay ng tao ay ang karagatan at ang kabundukan,” panawagan ni Father Garcia as Radyo Veritas.
Samantala, umaasa naman si Fr. Garcia, na ibabahagi ni Department of Environment and Natural Resources Secretary Gina Lopez kay Pangulong Duterte ang mga mahahalagang aral ng Santo Papa sa Laudato Si.
Dagdag pa ni Fr. Garcia, sa pamamagitan ng pag-aaral at pagsasabuhay sa Laudato Si ay mas malilinang ng bansa ang paggamit sa likas na yaman nito.
“We are hoping na sana maging open ang ating presidente duon sa sinulat ng ating Santo Papa yung Laudato Si at hopefully i-enlighten sya ng ating madam secretary tungkol doon sa mga concrete points na sinasabi ng ating Santo Papa na makatutulong paano pangalagaan, mahalin, at pakinabangan ang mga kayamanan ng ating bansa,” dagdag pa ni Fr. Garcia.
Ang Manicani island na bahagi ng Guian Eastern Samar ay mayroong 3,000 residente na pangunahing inaasahan ang karagatan na pinagkukunan nito ng kabuhayan.
Bahagi rin ito ng Guiuan Bay Protected Landscape and Seascape sa ilalim ng Presidential Proclamation No. 469.
Ang mga kumpanya namang nagmimina dito ay ang Nickel Asia Corporation at Hinatuan Mining Corporation.
