196 total views
Mahalaga ang partisipasyon ng komunidad at bawat parokya ng Simbahang Katolika upang masuportahan at protektahan ang mga drug-addict na nagnanais ng magbagong buhay sa gitna ng patuloy na kampanya ng pamahalaan laban sa ilegal na droga.
Nanawagan si Lipa Archbishop Ramon Arguelles – chairman ng CBCP Permanent Committee on Public Affairs na hindi nararapat na itaboy sa pamayanan at ituring na salot lalo na ng kanilang pamilya ang mga nalulong sa ipinagbabawal na gamot.
Inihayag ng Arsobispo na sa halip na ituring na may nakakahawang sakit ang mga nalulong sa droga ay kinakailangan ang suporta ng bawat isa upang tuluyang masupil at bigyan ng pag-asang makapagbagong buhay ang mga biktima.
“Ako hinihiling ko sana ang mga pari natin, mga lay people,i-welcome ang mga ito, huwag silang ituring na parang outcast, kung sila’y magbabago tulungan natin kung hindi pa sila nagbabago, ipagdasal pa rin natin at siguro magkaisa sa mga communities natin, ang lahat na hindi lang supilin ang mga bisyo na isang menace kundi lagyan ng magandang pag-asa yung atmosphere ng love pagkatapos yung atmosphere ng help…”panawagan ni Archbishop Arguelles sa panayam ng Radio Veritas.
Sa pinakahuling tala ng Philippine National Police (PNP) mula lamang July 1 hanggang August 22, 2016 umaabot na sa 8,600 ang mga naarestong drug suspects sa buong bansa kung saan 712 sa mga ito ang napatay sa operasyon ng mga pulis.
Umaabot naman sa 570,000 drug users at pushers ang kusang sumuko sa mga otoridad.
Sa kabila nito, inihayag ng Dangerous Drugs Board na mayroong 15 government-owned at 27 private drug rehabilitation centers sa bansa na accredited ng Department Of Health habang dalawa lamang ang kabilang sa DOH Accredited Treatment and Rehabilitation Centers ng Dangerous Drugs Board na pinamamahalaan ng religious congregations ng Simbahang Katolika.
Paulit-ulit na sinasabi ni Pope Francis na maging ang mga nagkasala sa ilalim ng batas ay kinakailangan pa ring bigyang ng makataong pagkalinga at igalang ang karapatang mabuhay ng marangal upang muling makapagbagong buhay.
