783 total reads
Sinalamin ng patuloy na pagtaas ng bilang ng mga kabataang nabubuntis na hindi epektibo ang pinapairal na Reproductive Health Law o RH Law.
Ayon kay Rita Linda Dayrit, pangulo ng Pro-life Philippines Foundation Inc., nakababahala ang pagtaas ng bilang ng mga batang nagbubuntis na nangangahulugan ng kabiguan ng Reproductive Health Law na isinulong ng pamahalaan.
Pagbabahagi pa ni Dayrit, nangangahulugan rin ito na hindi epektibo ang nilalaman ng batas na pagsusulong ng sex education at paggamit ng mga contraceptives tulad ng condom.
“It is a total failure kasi alam mo ipinaglaban nila yan di ba ng mga Kongresista natin, ng DOH ipinaglaban nila yang RH Law para daw mabawasan isa yan sa inaano nila mabawasan ang teenage pregnancy, so the fact na tumataas that means hindi effective ang RH Law.
Hindi effective, hindi naging effective yung isinusulong nilang sex education, diba yan ang sinasabi nila kailangan alam ng mga bata ang itsura ng condom hindi effective.
Hindi effective yung promotion ng condom dahil ang mga bata nabubuntis pa din…” ang bahagi ng pahayag Dayrit sa panayam sa Radyo Veritas.
Giit ni Dayrit, higit na mahalaga ay ang paggabay ng mga magulang sa mga kabataan lalu na sa usapin ng pagpapahalaga sa sarili at sa pangangatawan na templo ng Espiritu Santo.
Binigyang diin rin ni Dayrit na sa halip na turuan ng paggamit ng mga contraceptives ang mga kabataan ay mas mahalagang isulong ang pangangalaga sa moralidad at ispiritwalidad ng mga kabataan.
“Kaya nga ang isinusulong namin palagi is always effective parenting at pagbabantay sa mga bata, education talaga dapat, education talaga na maituro sa mga kabataan kung papaano to have an abstinence relationship yung chase, pahalagahan nila ang katawan nila na tayo ay temple of the Holy Spirit.” Dagdag pa ni Dayrit.
Batay sa datos ng Philippine Statistics Authority, tumaas ng 7% ang bilang ng teenage pregnancy sa bansa o mga babaeng nanganak edad 15 taong gulang pababa noong 2019, kumpara noong 2018.
Sa tala ng Commission on Population and Development (PopCom) ito na ang ika-siyam na sunod na taon na tumataas ang bilang ng teenage pregnancies mula noong taong 2011.
Kaugnay nito nasasaad sa encyclical ni Pope John the 23rd noong 1963 na Pacem in Terris na mahalagang patatagin ang pamilya bilang pundasyon ng matatag at maayos na pagkatao ng mga kabataan.
