637 total reads
Tiniyak ng pinuno ng Military Ordinariate of the Philippines na patuloy ginagabayan ng Panginoon ang sanlibutan sa iba’t ibang hamong kinakaharap.
Ayon kay Bishop Oscar Jaime Florencio tinupad ni Hesus ang habilin nitong ipapadala ang Banal na Espiritu na magsisilbing gabay ng sangkatauhan.
“The Holy Spirit will enlighten us, ito ang magbibigay liwanag sa ating landas lalong lalo na sa pagtahak natin nitong COVID 19 crisis,” pahayag ni Bishop Florencio sa panayam ng Radio Veritas.
Ang pagninilay ng obispo ay kaugnay sa pagdiriwang ng Linggo ng Pentekostes ang ika – 50 araw mula sa Linggo ng Muling Pagkabuhay at pagbaba ng Espiritu Santo sa mga apostol.
Itinuring ni Bishop Florencio na kalakasan ng simbahan ang Banal na Espiritu na nanatiling gabay sa paglalakbay kung saan tinaguriang kaarawan ng simbahan ang nasabing pagdiriwang.
Hamon ng obispo sa mananampalatayang pinanghihinaan dahil sa pandemya na hingin ang paggabay ng Panginoon sa pamamagitan ng Espiritu Santo upang lumakas at tumibay ang tumatamlay na pananampalataya.
Batay sa tala ng World Health Organization mahigit 264 milyong indibidwal sa buong mundo ang nakararanas ng depresyon na pinalubha pa ng pandemya kung saan halos 85 porsyento rito ang hindi natutugunan dahil sa kakulangan ng access sa pagpapagamot.
Paliwanag pa ng obispo bagamat walang katiyakan na manumbalik sa normal ang lipunan, nakatitiyak naman itong may liwanag na hatid ang Banal na Espiritu na tatanglaw sa mamamayan.
Hinikayat din nito ang bawat isa na harapin ang mga pagsubok at makiisa sa paghihirap ng simbahan tulad ng mga halimbawa na ipinakita ni Hesus sapagkat ito ang magpapatibay sa pananampalataya ng bawat isa.
“The more sacrifices, the more sufferings that we have ang pananampalataya natin ay tumitindi at lumalago because the Holy Spirit helps us in purification,” ani Bishop Florencio.
Inaanyayahan ni Bishop Florencio ang mananampalataya na dumalo sa Banal na Misa sa Linggo ng Pentekostes sa simbahan para sa mga pinahihintulutang makadalo sa 30 porsyentong kapasidad ng simbahan kasabay ang paalala na sundin ang safety health measures upang makaiwas sa pagkahawa.
Sa mga hindi makadadalo ng pisikal sa Banal na Misa ay hinikayat na makiisa sa online livestreaming sa mga social media pages ng bawat parokya.
