310 total reads
Nangakong maglalaan ng 3.5-bilyong COVID-19 vaccine ang mga kumpanyang Pfizer, Moderna at Johnson & Johnson para sa mga mahihirap na bansang hirap makakuha o makabili ng bakuna laban sa COVID-19.
Sa isinagawang G20 Health Summit, sinabi ng tatlong kumpanya na maglalaan ito ng vaccines sa mga mahihirap na bansa at ipagbebenta sa murang halaga.
Magpapadala ng dalawang bilyong doses ng vaccine ang kumpanyang Pfizer, kabilang na rito ang isang bilyong doses ngayong taon; habang ang Moderna naman ay maglaan ng nasa 95 milyong doses ngayong taon at nasa 900 milyon naman para sa taong 2022.
Mayroon namang kasunduan ang Johnson & Johnson sa COVAX na maglalaan ito ng hanggang 200 milyong doses ng vaccine ngayong taon at tinalakay ang pagdaragdag pa ng 300 milyong doses, kung saan 500 milyong doses na ang kabuuang mailalaan ng nasabing kumpanya.
Kaugnay nito’y nauna nang nakapaglaan ng 100 milyong vaccines ang European Union para sa mga mahihirap na bansa sa buong mundo.
Samantala, dito naman sa Pilipinas ay ipinag-utos ni Pangulong Rodrigo Duterte na ang mga donated Pfizer BioNTech COVID-19 vaccines ay ilalaan sa mga mahihirap na komunidad.
Sang-ayon ito sa inilatag na kondisyon sa global aid COVAX facility na pinagmulan ng 193,050 doses ng nasabing vaccines.
Batay sa pagsusuri ng Philippine Food and Drug Administration (FDA), ang Pfizer-BioNTech ay may efficacy rate na 95-porsyento sa study population at 92-porsyento naman sa across all races.
Sa panig naman ng Simbahang Katolika, nauna na nitong panawagan na nawa’y unahin at pagtuunan ng pansin ng pamahalaan ang mga mahihirap upang mabigyan ng suporta at maibilang sa mga libreng makakatanggap ng COVID-19 vaccine para maging ligtas sa banta ng nakahahawa at nakamamatay na sakit.
