822 total views
Binigyang-diin ng grupong Oceana Philippines na mahalagang agarang maisabatas ang Single-use Plastic Products Regulation Bill upang mabawasan ang panganib na dala ng mga plastic sa ating kapaligiran.
Ayon kay Atty. Gloria Estenzo Ramos, vice president ng grupo na batid nang lahat na nasa bawat mamamayan ang responsibilidad para mapanatili ang kalinisan ng ating kalikasan.
Ngunit kinakailangan nito ang mas pinaigting na pagtutulungan at epektibong pagpapalaganap ng iba’t ibang impormasyon upang makatulong sa agarang pagpasa ng batas hinggil sa tuluyang pagbabawal sa paggamit ng single-use plastics.
“We know that the solution is in our hands but we need to work harder, work together, collaborate, and it’s important to have consumers who are informed, and fully engaged in decision-making, ito ‘yung kailangang magawa natin,” pahayag ni Atty. Ramos.
Tinukoy naman ni Atty. Ramos na dapat maglabas ang National Solid Waste Management Commission ng mga listahan ng mga produktong mayroong plastic packaging na lubhang nagdudulot ng malaking ambag sa plastic pollution at basura sa kapaligiran.
Paliwanag ng opisyal na mahaba-haba pang proseso ang pagdadaanan upang tuluyang mapigilan ang paglaganap ng plastic pollution gayundin ang matiyak na ito’y hindi na magdulot ng malaking epekto sa kalusugan ng tao at ang nararanasang climate change.
“Our call is to really stop plastic pollution at the source. The National Solid Waste Management Commission should already issue the list of non-environmentally acceptable products and packaging. This will go a long way in stopping plastic pollution at the very source,” ayon kay Atty. Ramos.
Samantala, aprubado na sa ikalawang pagbasa ang House Bill No. 9147 o ang Single-Use Plastics Products Regulation Act na layong mapigilan ang paglikha at ang paggamit sa iba’t ibang uri ng plastik sa mga susunod na taon.
Batay sa survey ng Social Weather Station, pito sa sampung Filipino ang sang-ayon na itigil na ang paggamit ng mga single-use plastic sa bansa. Magugunitang sa Laudato Si ni Pope Francis, binigyang diin nito ang kahalagahan ng pag-aalaga sa kapaligiran dahil sa kasalukuyan ay unti-unti nang nagmimistulang malawak na tambakan ng basura ang daigdig.
