559 total views
Suportado ng opisyal ng Catholic Bishops’ Conference of the Philippines ang hakbang ng pamahalaan na limited face to face classes.
Ayon kay Nueva Segovia Archbishop Marlo Peralta, ang vice chairman ng CBCP-Episcopal Commission on Catechesis and Catholic Education, mahalaga ang pisikal na pagdalo ng mga kabataan subalit mahalaga ang suporta ng magulang lalo’t mapanganib pa rin ang epekto ng coronavirus sa lipunan.
“Okay yan [face to face classes] basta may support ng mga magulang; the ideal is ‘in person’ ang classes ng mga estudyante ngunit dahil sa surging cases ng COVID/Delta variant, baka maalanganin din ang mga magulang na pumasok sa eskwelahan ang mga anak nila,” pahayag ni Archbishop Peralta sa Radio Veritas.
Sinabi ng arsobispo na nararapat isaalang-alang ang kapakanan at kaligtasang pangkalusugan ng mga kabataan sa pagpapatupad ng face to face classes sapagkat labis na lantad sa panganib ang mga bata sa nakakahawang karamdaman.
Batid ni Archbishop Peralta ang hirap na dinanas ng mga kabataan sa pagpatupad ng blended learning partikular sa mga kanayunan kung saan hindi naaabot ng serbisyo ng internet.
“But it’s also obvious na maraming disadvantages ang online learning; sa totoo lang hindi nakakapag-aral ang mga estudyante lalo na yung mga nasa barangay dahil sa kakulangan ng laptop at internet connection among other things. It’s really a dilemma,” ani ng arsobispo.
Kamakailan ay inaprubahan ng Pangulong Rodrigo Duterte ang pagbabalik ng face to face classes sa 120 paaralan sa bansa sa mga lugar na may mababang kaso ng COVID-19.
Kabilang sa mga kabataang sasalang sa pilot testing ang kindergarten hanggang Ikatlong baitang at ang senior highschool na kumukuha ng technical vocational strand programs.
Sa isinagawa namang vaccination rollour nasa 40 milyong Filipino na ang nabakunahan kung saan kalahati dito ang kompleto na sa bakuna kontra COVID-19.
Pinag-aralan na rin ng pamahalaan ang pagbabakuna sa mga batang edad 12 taong gulang para mas mapigilan ang paglaganap ng virus lalo na sa kabataan.
Hinimok ni Archbishop Peralta ang mga kinauukulang opisyal na tiyakin ang kalusugan ng mga kabataan sa pagbabalik ng limited face to face classes sa bansa.
