446 total views
Inaanyayahan ng Claretian Missionary ang mananampalataya sa gaganaping Word Conference 2021 sa Nobyembre.
Sa pahayag ng Claretian Communications Foundations, Inc. sa pamumuno ni Fr. Julius Jose Coching, CMF ibinahagi nitong layunin ng pagpupulong na mabuksan ang kamalayan ng mananampalataya hinggil sa misyon bilang bahagi ng kristiyanong pamayanan.
“The participants of this year’s Word Conference are called to return to our roots, to be renewed to our resolves and to revitalize our responsibilities. It is a call to be grateful of the gift, to recommit to the gift and to be charitable with the gift as we do mission through new evangelization,” bahagi ng pahayag ng Claretian Communications.
Tema ng WordCon 2021 ang ‘Gifted to Give: “A gift opens the way and ushers the giver into the presence of the Great” na isasagawa sa November 29 at 30 sa alas nuwebe ng umaga hanggang alas dose ng tanghali.
Ito ang paraan ng Claretian missionary na mabigyang pag-asa ang mamamayan na puno ng pangamba at alinlangan bunsod ng nangyayari sa paligid lalo na ng coronavirus pandemic.
Pagtuunan ng pansin sa WordCon ang paksang ‘Kaloob, na Sinasaloob at Ipinagkaloob’ na hango sa pagdiriwang ng 500 Years of Christianity ng bansa.
Nais nitong pagnilayan ng mamamayan ang mga kaloob tulad ng mga kwento ni Hesus sa Mabuting Balita, mga kaloob sa Salita ng Diyos sa pamamagitan ng mga awitin, mga kaloob na palatandaang itinatag sa mga simbahan at dambana, at ang kaloob ng pakikipag-ugnayan sa Panginoon sa pamamagitan ng debosyon ng mananampalataya.
Ito sentro ng talakayan sa dalawang araw na pagpupulong online sa pamamagitan ng zoom na mapapanuod sa facebook pages ng Claretian Missionaries at Radyo Veritas Ph.
Umaasa si Fr. Coching na maging mabunga at higit na mahimok ang mananampalataya na isabuhay ang misyon bilang kristiyano na ipalaganap si Kristo sa pamayanan.
Ang WordCon ay inisyatibo rin ng Bible Apostolate of the Claretian Missionaries – Philippine Province sa pagdiriwang ng ika – 75 anibersaryo ng pagmimisyon sa Pilipinas.
Sa mga nais lumahok sa WordCon 2021 makipag-ugnayan lamang sa Claretian Communications Foundation, Inc kay Geraldine Vireynato at Analyn Dayandante sa telepono (02) 8921-3984 local 103 o mag-email sa [email protected] at bisitahin ang official website www.wordcon.ph.
