717 total views
Ibinahagi ng Prelatura ng Marawi na naipagkaloob na sa ilang pamilya ng internally displaced person (IDP) ang mga bahay na magiging pangmatagalang tahanan.
Ayon sa pahayag ni Bishop Edwin Dela Peña, 49- pamilya ng mga IDP na sakop ng St. Mary’s Cathedral Parish sa Marawi ang nakalipat na sa kanilang mga tahanan sa CFC ANCOP Canada Winnipeg-Prelature of Marawi Community sa Brgy. Maria Cristina, Baloi, Lanao del Norte.
Sinabi ng obispo na patuloy ang pakikipag-ugnayan ng simbahan sa mga biktima ng Marawi siege sa tulong ng mga programa tulad ng munting pamayanan na tututok sa pagpapalago ng pananampalataya ng komunidad.
“Accompaniment with them will be a continuing mission for the tri-partners which include building them into Gagmayng Kristohanong Simbahan (GKS), ongoing formation for them to deepen their faith-life, values formation, introducing livelihood program and scholarships for the youth and children,” bahagi ng pahayag ni Bishop Dela Peña.
Pinasalamatan ng obispo ang mga katuwang ng prelatura na maisakatuparan ang proyekto ang CFC ANCOP-Canada/Lanao at ang Tanging Yaman, Foundation sa pangunguna ni Jesuit priest Fr. Manuel ‘Manoling’ Francisco.
Ang mga benepisyaryong IDP’s ay nanunuluyan sa sa Tent City nang mapinsala ang bahagi ng Marawi na labis naapektuhan ng digmaan noong 2017 nang kubkubin ng ISIS-inspired Maute group ang Islamic city.
“We hope to engage more partners to be able to sustain this lofty dream of making it a showcase of rehabilitating the lives of our bakwit communities,” ani Bishop Dela Peña.
Batay sa ulat ng pamahalaan halos kalahating milyong mamamayan ng Marawi ang lumikas noong digmaan limang taon na ang nakalilipas.
