Hinimok ng opisyal ng Office on Stewardship ng Catholic Bishops’ Conference of the Philippines ang mananampalataya na ituon ang atensyon kay Hesus upang magkamit ang buhay ng walang hanggan.
Ayon kay Taytay Palawan Bishop Broderick Pabillo makakamit ng tao ang labis na kasiguraduhan sa buhay kung matutuhang ipagkatiwala sa Panginoon ang lahat ng bagay.
“Huwag tayong maghanap ng security, ng kasiguraduhan sa buhay. Magtiwala tayo sa Diyos. Ibigay natin ang full attention natin sa kanya. Demanding si Jesus kasi hindi siya tumatanggap ng compromises. Iyan ang buhay niya at iyan ang hinihingi niya sa atin kasi iyan ang magdadala sa atin sa buhay na walang hanggan,” ayon sa pagninilay ni Bishop Pabillo.
Batid ng opisyal ang mga hamong kinakaharap ng tao sa kasalukuyang panahon tulad ng pandemya na kumitil ng buhay sa milyong-milyong katao at nagpabagsak sa ekonomiya ng buong mundo.
Hinimok ng obispo ang lahat na mas paigtingin ang pakikipag-ugnayan sa Panginoon upang mapagtagumpayan ang bawat pagsubok.
Sinabi ng obispo na kung hindi nakatuon kay Hesus ang buhay ng mamamayan madalas itong nahuhulog sa kasamaan at lalong panghihinaan sa bawat hamong nararanasan.
Ipinaalala rin ni Bishop Pabillo sa mamamayan ang masamang kahahantungan sa labis na paghahangad ng kapangyarihan sa lipunan na magdudulot ng pang-aabuso sa kapwa.
“Power is dangerous, even religious power. It can easily be abused. Kailangan mahubog tayo sa pamamaraan ni Hesus,” ani Bishop Pabillo.
Paalala ni Bishop Pabillo sa mananampalataya na hindi dapat mangamba ang mamamayan sa iba’t ibang karanasan sapagkat hindi pinababayaan ni Hesus ang lahat ng sumusunod sa kanya kundi matatamo nito ang buhay na walang hanggan kasama ng Panginoon.
