599 total views
Ipamahagi sa mga magsasaka ang ipinangakong lupa at sundin ang batas sa ilalim ng Agrarian Reform.
Ito ang paninindigan ni Taytay Palawan Bishop Broderick Pabillo para sa mga magsasaka ng Barangay Sumalo, Hermosa Bataan.
“Palaging sinasabi ng simbahan na ang kayamanan, kayamanan ng lupa ay kayamanan ng lahat. Ang mga maliliit na farmers ay may karapatan at may batas tayo diyan, may karapatan sila sa lupa at hindi lang sila pinangakuan ay naayon sa batas ang agrarian reform,” ayon sa panayam ng Radio Veritas sa Obispo.
Ginawa ni Bishop Pabillo ang apela upang matigil na ang kaguluhan sa lugar kung saan isa sa mga magsasaka ang napatay matapos akusahan ng trespassing ng kumpanya.
Patuloy ang panawagan ng ‘Samahan ng mga Nagkakaisang Mamamayan ng Barangay Sumalo o SANAMABASU’ sa pamahalaan at Department of Agrarian Reform (DAR) na ipamahagi na ang mga ipinangakong lupa na inaangkin ng kompanyang Riverforest Development Corporation (RDC).
Nabatid mula sa SANAMABASU farmers na taong 1970 ng magsimula ang pang-aangkin ng RDC sa mga lupang sakahan.
Iginiit ni Bishop Pabillo na kailangang manindigan ang bagong pamahalaan para sa maliliit na magsasaka na siyang layunin ng Comprehensive Agrarian Reform Program Extension with Reform (CARPER) o Republic Act 9700 upang matigil na ang mga kaguluhan sa kanayunan.
“Ang pamahalaan lalung-lalu na ang bagong pamahalaan ay manindigan para sa maliliit na bigyan ng katapusan itong land reform na matagal programa ng gobyerno. Ito yung dahilan ng maraming gulo sa kanayunan dahil sa hindi makatarungan o hindi nabibigyan ng hustisya ang mga tao,” paninidigan ng Obispo para sa mga magsasaka ng SANAMABASU.
Sa kasalukuyan sa kabila ng kautusan ni Agrarian Reform Secretary Bernie Cruz na agad isagawa ang ‘Land Acquisition and Distribution’ sa lugar ay pinagbabawalang makapasok ng mga armadong guwardiya ng RDC ang sinuman sa lupain sa Barangay Hermosa.
