792 total reads
Inaasahan ng Alyansa Tigil Mina na magkakaroon ng tunggalian sa pagitan ng Department of Environment and Natural Resources at economic group ng administrasyon ni President Ferdinand “Bongbong” Marcos, Jr.
Ito ang pahayag ni ATM National Coordinator Jaybee Garganera sa pagiging nominado ni Ma. Antonia “Toni” Yulo-Loyzaga bilang kalihim ng DENR ng Marcos Jr. Administration.
Ayon kay Garganera, inaasahan ng grupo na gagamitin ni Loyzaga ang kanyang kaalaman at kakayahan sa larangan ng agham upang mapabuti at mapangalagaan ang mga likas na yaman ng bansa.
“The lack of a clear program of President Bongbong Marcos, we think she [Loyzaga] has a serious challenge ahead of her. Pero optimistic kami that with her science background, she brings in a fresh mandate dito sa DENR ng science-based policy making. Doon kami looking forward,” ayon kay Garganera sa panayam ng Radio Veritas.
Pinagtutuunan ng Marcos Jr. Administration ang industriya ng pagmimina na tinitingnang makakatulong sa pagbangon ng ekonomiya ng bansa mula sa mga nagdaang krisis.
Gayunman, matinding pinsala, panganib at paghihirap naman ang maidudulot nito sa kalikasan at apektadong pamayanan.
Kaya inaasahan ng ATM na sa pagiging DENR Secretary ni Loyzaga ay mababawasan at mapipigilan ang pagpasok ng industriya ng pagmimina sa bansa.
“Ang tingin ko kung sino ‘yung mga ilalagay niyang Undersecretaries to be her senior management, that will determine kung saang direction talaga niya dadalhin ang DENR. So we expect less mining kung siya nga ang maaappoint na secretary ng DENR,” ayon
Si Loyzaga ay naging chairperson ng International Advisory Board ng Manila Observatory kung saan kanyang isinulong ang scientific research tungkol sa climate and disaster resilience.
Naglingkod din ito bilang technical adviser ng Philippine Disaster Resilience Foundation at bahagi ng Senior Advisory Board ngayon ng Armed Forces of the Philippines Command at General Staff College.
Nananatili pa sa ngayong nominado si Loyzaga bilang DENR Secretary hanggang sa makumpleto nito ang mga kinakailangang dokumento.
