690 total views
Umaasa ang labor sector na tutuparin ni Pangulong Ferdinand Marcos Jr. ang kaniyang mga pangako na tulungan at mapabuti ang hanay ng manggagawa.
Ito ang panawagan ng Kilusang Mayo Uno (KMU) at Buklurang ng Manggagawang Pilipino (BMP) kaugnay ng pagdaraos ng unang State of the Nation Address ng punong ehekutibo.
Ayon kay Ka Leody De Guzman-Chairperson ng BMP nawa ay hindi matulad ang pamumuno ni President Marcos sa mga nagdaang administrasyon kung saan nananatili ang banta ng kontrakwalisasyon at magkakaibang minimum wage ng mga manggagawa.
‘Itaas niya ang mga sahod ng mga manggagawa sa probinsya kasi ho walang batayan talaga yon, pareho lang ang bilihin sa probinsya’ ayon De Guzman sa panayam ng Radio Veritas.
Binigyang diin naman ni Jerome Adonis – KMU Secretary General na dapat pangunahan ng pamahalaan ang mga hakbang na iwaksi ang pag-uugnay sa mga labor leaders at members bilang kasapi ng makakaliwang grupo
Ayon kay Adonis, inilalagay nito sa panganib ang buhay ng mamamayang ipinaglalaban lamang ang karapatan bilang mga manggagawa
“Itigil yung red-tagging dahil ito ay isang kongkreto at gross violation sa amin bilang mga leader at mga unyonista na nilalabag completely mismo ng gobyerno mismo dahil sa pag-issue niya EO 70 na nag-create ng NTF-ELCAC, 56 ang pinatay under duterte administration,” ayon pa sa panayam ng Radio Veritas kay Adonis.
Bagamat hindi nabanggit ni Pangulong Marcos ang pagbuwag ng kontrakwalisasyon at pagpapatupad ng iisang national minimum wage, sinabi naman ng pangulo sa kanyang talumpati ang pagbibigay daan ng trabaho ang mas maraming manggagawa sapagsasaayos at pagpaparami ng produksyon sa lokal na sektor ng agrikultura.
Una ng naging panawagan ng Manila Archdiocesan Ministry for Labor Concern sa Administrasyong Marcos ang pagpapatupad ng mga polisiyang tutulungan ang mga manggagawa at pagtatakda ng 750pesos national minimum wage.
