1,178 total views
Nanawagan ang opisyal ng Catholic Bishops’ Conference of the Philippines sa mananampalataya na iwasan ang mga haka-haka kaugnay sa sinasabing pagbibitiw ng Kaniyang Kabanalan Francisco.
Giit ni Balanga Bataan Bishop Ruperto Santos-chairman ng CBCP-Episcopal Commission on Pontificio Collegio Filipino sa halip ay mas dapat ipanalangin ng sambayanan ang kalusugan ni Pope Francis upang mas makapaglingkod sa simbahan.
“Let us always turn to prayers and entrust everything to God’s mercy and will, we resort to prayers for our world, for our loved ones, especially our dearest and beloved Holy Father whom we affectionately call Lolo Kiko,” pahayag ni Bishop Santos sa Radio Veritas.
Sinabi ng obispo na mahalagang ipagkatiwala sa Panginoon ang Santo Papa na maging matatag sa kanyang gawaing pagpapastol sa mahigit isang bilyong katoliko sa mundo.
“In these uncertain times of pandemic, war and weather disturbances we look up to God for His protection, guidance and for His healing,” ani Bishop Santos.
Pakiusap din ng opisyal ng simbahan sa mananampalataya na iwasan ang espekulasyon hinggil sa pagpapalit ng pamunuan ng simbahan na nagdudulot lamang ng pagkalito ng mananampalataya.
Ito ay sa kabila ng mga usaping pagretiro ni Pope Francis dulot ng karamdaman na dahilan ng pagkaantala ng mga gawain.
