631 total reads
Hinimok ng Kanyang Kabanalan Francisco ang mananampalataya na panibaguhin at isabuhay ang pagtalaga ng mundo sa Divine Mercy.
Ito ang mensahe ng Santo Papa sa paggunita ng ikalawang dekada buhat nang italaga ni Pope St. John Paul II ang daigdig sa Banal na Awa ng Panginoon na ginanap sa Shrine of Divine Mercy, sa Krakow, Poland.
Ayon kay Pope Francis sa mga kasalukuyang nangyayari sa mundo ay mahalagang hilingin sa Panginoon ang dakilang awa at habag upang maligtas ang tao mula sa kapahamakang dulot ng karahasan at kasalanan.
“More than ever today, we see the meaning of that gesture, which we want to renew in prayer and in the witness of life. Mercy is the way of salvation for each of us and for the whole world,” pahayag ni Pope Francis.
August 17, 2002 nang pangunahan ni St. John Paul II ang pagtalaga ng mundo sa Divine Mercy na higit kinakailangan ang awa ng Panginoon lalo’t nahaharap ang tao sa iba’t ibang uri ng panganib at pang-aakit ng kasamaan.
Ito ay kasabay ng pagtalaga ng santo sa Shrine of Divine Mercy sa Poland na patuloy dinarayo ng mga deboto ng Divine Mercy at iba pang mananampalataya na nagsagawa ng pilgrimage sa lugar.
Samantala hiling ni Pope Francis sa mamamayan na idulog sa Diyos ang natatanging intensyon ng mga mamamayan sa Ukraine na labis na apektado sa mahigit anim na buwang digmaan sa pagitan ng Russia.
“And we ask the Lord for special mercy, mercy and pity for the tortured Ukrainian people,” ani Pope Francis.
Ayon sa datos 15-libong katao na ang nasawi sa digmaan at daan-daang libo naman ang lumikas upang makaiwas sa karahasan.
