682 total views
Tiniyak ng bagong kalihim ng Department of Science and Technology na mas paiigtingin ang mga plano hinggil sa pagsusuri sa galaw ng lupa at aktibidad ng mga bulkan sa buong bansa.
Ayon kay Science and Technology Secretary Renato Solidum na mayroong strategic plan ang Philippine Institute of Volcanology and Seismology (PHIVOLCS) upang mas mapabuti at mapadali ang pagtukoy sa mga seismic activity o nangyayaring pagyanig ng lupa sa Pilipinas.
Sinabi ni Solidum, dating director ng PHIVOLCS na nasa 115 na ang nakatayong seismic station sa bansa at balak pang dagdagan ito sa 300 upang masiguro ang kalagayan ng lahat ng aktibo at potensyal na fault line sa bansa.
“Ang hangarin natin dito ay kapag mas madami ang seismic station, ‘yung mga maliliit na lindol, ‘yung mga magnitude 2 and above kayang kaya po ng ating seismic network ‘yan. Kung gusto pa nating makadetect ng maliliit na lindol na maaaring makapagbigay sa atin ng idea na baka may malaking earthquake na susunod kapag gumagalaw na ‘yung fault ay papadamihin natin,” pahayag ni Solidum sa panayam ng Radio Veritas.
Layunin ding paigtingin ng PHIVOLCS ang paglalagay ng earthquake intensity monitors upang madaling matukoy ang mga lugar na apektado sakaling may maganap na paglindol.
Paliwanag ni Solidum na kadalasan ay umaasa lamang ang ahensya sa mga ulat mula sa lokal na pamahalaan kaya hindi agad natutukoy ang lawak ng epekto ng mga pagyanig.
“Nagde-devevelop tayo at naglalagay tayo ng mga earthquake intensity meters para maipakalat sa buong Pilipinas. Magdadagdag pa tayo ng 200 at sa kasalukuyan mayroon na tayong close to 200 para mapabilis ang pagkalap ng information,” saad ni Solidum.
Ibinahagi rin ng dating director ng PHIVOLCS na mayroon ding state-of-the-art na kagamitan ang ahensya sa pagbabantay sa kalagayan ng mga bulkan sa bansa.
Tinukoy ni Solidum ang mahigpit na pagbabantay sa mga aktibong bulkan tulad ng Bulkang Bulusan, Bulkang Pinatubo, lalo na ang Bulkang Taal na bagamat nasa Alert Level 1 status ay patuloy na nagdudulot ng pangamba sa publiko.
Gayunman, sinabi ng kalihim na mahalaga pa rin ang mayroong sapat na kaalaman at kahandaan ng publiko para sa kaligtasan sa anumang sakuna.
Si Solidum ay naglingkod sa PHIVOLCS mula 1984, kung saan siya ay direktor mula 2003 hanggang 2017 at officer-in-charge mula 2017 hanggang sa kasalukuyang taon bago italaga ni Pangulong Ferdinand Marcos, Jr. bilang bagong DOST secretary.
